Президент Әулиетаудың етегінде Мемлекеттік рәміздер алаңын ашуды тапсырды.
Ұлытауда Ұлттық құрылтайтың алғашы жиыны өтіп жатыр, деп хабарлайды Almaty-akshamy.kz.
Мемлекет басшысы Қасым-Жомарт Тоқаев Ұлттық құрылтайдың Ұлытауда басталғаны дұрыс болғанын алға тартты. Оның айтуынша киелі өлке Жаңа Қазақстанды құру жолында бірліктің символына айналды. Осы орайда Президент тағы бір бастама көтерді.
"Бұл жерде барлық рулардың таңбасы тасқа жазылған. Сол арқылы бабаларымыз ұлт бірлігін көрсеткен. Қаныш Сәтбаев «Еліміздің ту тіккен жері – Таңбалы тас» деген. Өкінішке қарай, қастерлі жазулар кейін әбден бүлінді. Ел азаматтары Ұлытауға ескерткіш қойып, тастағы таңбаларды жаңғыртты. Бірақ, бұл жеткіліксіз деп ойлаймын. Мұнда қазақтың бірлігін әйгілейтін сәулетті нысан тұруы керек", - деді Қазақстан Республикасының Президенті Қасым-Жомарт Тоқаев.
Құрылтай жиыны барысында Президент киелі жерде еліміздің көк байрағы желбіреп тұруы керектігін айтты.
"Мен Әулиетаудың етегінде Мемлекеттік рәміздер алаңын ашуды тапсырамын. Қасиетті өңірде көк байрағымыз асқақтап тұруға тиіс. Сол арқылы ұрпақтар сабақтастығы жалғасып жатқанын көрсетеміз. Тамыры терең мемлекеттігіміздің жаңа дәуірі басталғанын білдіреміз", - деді Мемлекет басшысы.