Бес қазақстандық университет әлемнің ең үздік оқу орындары қатарына енді, деп хабарлайды Аqshamnews.kz.
Бұл туралы Президент Қасым-Жомарт Тоқаев «Қазақстан – академиялық білім аумағы» халықаралық стратегиялық серіктестер форумында мәлімдеді. Мемлекет басшысы еліміздегі жоғары оқу орындарының беделді халықаралық рейтингтердегі көрсеткіштері тұрақты түрде жақсарып келе жатқанын атап өтті.
Президенттің сөзінше, қазақстандық ЖОО-лардың жетістігі әлемдік білім беру кеңістігіндегі еліміздің орнын айқындай түседі.
"QS халықаралық рейтинг агенттігінің президенті Нунцио Квакварелли мырза өз баяндамасында бұл мәселеге кеңінен тоқталды, Қазақстан университеттерінің қарқынды дамып келе жатқанын ерекше атап өтті. Біз ортақ мақсат жолында күш біріктіріп, әріптестігімізді нығайта түсуге мүдделіміз, бірлесіп жұмыс істеуге қашанда дайынбыз. Сондай-ақ еліміздің 5 университеті Times Higher Education басылымы ұсынған әлемдегі үздік оқу орындарының тізіміне қосылды. Бұл да біз үшін зор жетістік", – деді Президент.
Форумда жоғары білім сапасын арттыру, халықаралық серіктестікті күшейту және үздік білім беру тәжірибелерін енгізу мәселелері талқыланды.