Ұлттық құрылтай отырысында Мемлекет басшысы Қасым-Жомарт Тоқаев Конституциялық реформаны одан әрі тереңдету жөнінде маңызды мәлімдеме жасады. Президенттің айтуынша, бастапқыда парламенттік реформа аясында Ата заңның 40-қа жуық бабына өзгеріс енгізу жоспарланған. Алайда жұмыс барысында түзетулер көлемі әлдеқайда ауқымды екені анықталған.
Мемлекет басшысы 2022 жылғы конституциялық реформа кезінде Ата заңның 33 бабы жаңартылғанын еске салды. Ал алдағы өзгерістер бұдан да кең ауқымды болмақ.
– Біз, шын мәнінде, жаңа Конституция қабылдаумен пара-пар қадам жасағалы тұрмыз. Сондықтан Конституциялық комиссия құру туралы шешім қабылдадым. Арнайы Жарлыққа ертең қол қоямын, – деді Президент.
Қасым-Жомарт Тоқаевтың айтуынша, Конституциялық комиссия құрамына 100-ден астам азамат енеді. Олардың қатарында Ұлттық құрылтай мүшелері, белгілі заңгерлер, бұқаралық ақпарат құралдарының басшылары, аймақтық мәслихат төрағалары, қоғамдық кеңес өкілдері және өзге де білікті мамандар болады. Комиссия жұмысына Конституциялық соттың төрағасы жетекшілік етеді.
Комиссия барлық ұсынысты жан-жақты сараптап, қорытып, нақты конституциялық өзгерістердің жобасын әзірлейді. Осыдан кейін жалпыхалықтық референдум өткізілетін уақыт белгіленбек.
Сонымен қатар Мемлекет басшысы әлемдегі күрделі геосаяси жағдайға қарамастан, Қазақстанда соңғы жылдары түбегейлі өзгерістер жүзеге асырылғанын атап өтті.
– 2022 жылғы конституциялық реформаға және Атом электр станциясын салуға қатысты референдум кезінде халқымыздың басым көпшілігі мені қолдады. Мен әрбір шешімді елге қажеттігі тұрғысынан мұқият саралап қабылдаймын, – деді Қасым-Жомарт Тоқаев.
Президент үшін азаматтардың әл-ауқатын арттыруға бағытталған нақты жұмыстардың бәрінен маңызды екенін жеткізді. Оның айтуынша, халықтың қамы, ұлт пен мемлекеттің мүддесі – басты құндылық.
– Алдағы уақытта да елімізді дамытып, Тәуелсіздігімізді нығайту жолында бар күш-жігерімді саламын. Стратегиялық бағдарымды үнемі қолдап келе жатқан барша халыққа және осы залда отырған еліміздің лайықты азаматтарына шын жүректен ризашылығымды білдіремін, – деді Мемлекет басшысы.
