Жетісу облысы Алакөл ауданының прокуратурасы білім беру ұйымдарындағы қауіпті қалдықтарды сақтау, пайдалану және кәдеге жарату тәртібіне қатысты тексеріс жүргізді.
Талдау барысында бірқатар мекемелерде санитарлық талаптардың өрескел бұзылғаны белгілі болды, - деп хабарлайды Aqshamnews.kz.
Қолданыстағы ережелерге сәйкес, істен шыққан сынапты шамдар арнайы, оқушылар кіре алмайтын бөлмеде сақталуы тиіс. Сондай-ақ оларды қарапайым қоқыс жәшіктеріне тастауға қатаң тыйым салынады (ҚР Денсаулық сақтау министрінің 2021 жылғы 5 тамыздағы №76 бұйрығы).
Алайда тексеріс кезінде бірнеше мектеп пен мемлекеттік балабақшада 436 дана істен шыққан сынапты лампаның ұзақ уақыт бойы қоймаларда, жертөлелерде және санитарлық талаптарда көзделмеген басқа да орындарда сақталғаны анықталды. Бұл өз кезегінде оқушылар мен қызметкерлердің денсаулығына нақты қауіп төндірген.
Прокуратураның қадағалау актісінен кейін барлық заңбұзушылықтар жойылып, қауіпті қалдықтар белгіленген тәртіппен шығарылды.
Нәтижесінде 3 458 азаматтың, соның ішінде 2 947 оқушы мен 511 қызметкердің құқықтары қорғалды.
