Алматы қаласы Жұмыспен қамту және әлеуметтік бағдарламалар басқармасына қарасты «Жан-Сая» дағдарыс орталығында да бүгін «Мектепке жол» акциясы аясында іс-шара өтті, – деп хабарлайды aqshamnews.kz тілшісі.
«Жан-Саяда» қазір 8 әйел мен 21 бала тұрады. Оның ішінде 11-і – мектеп жасындағы жеткіншек. Жаңа оқу жылы қарсаңында олар үшін мектеп формасы, аяқ киім, рюкзак және оқуына қажетті өзге де керек-жарақтар дайындалды.
Дәлірек айтсақ, осы қажетті заттардың бәрін алуға Түрксіб ауданының әкімдігі, «Каритас Қазақстан» қоғамдық қоры, отандық қоғам белсендісі, кәсіпкер, коуч-мотиватор Алтын Каникар, «Mrs Kazakhstan – 2026» байқауының финалисі, бизнесвумен және «Nazimen» брендінің негізін қалаушы Назира Зару қолдау көрсетті.
Міне, орталықта тұратын балалар үшін жаңа оқу жылы ерекше көңіл-күймен басталмақ. Іс-шара барысында шағын концерттік бағдарлама ұсынылып, өрендерге мектепке қажетті құрал-жабдықтар салтанатты түрде табысталды.Ә
Иә, әр баланың мектепке барар жолы кішкентай ғажайыптан басталады. Әдемі бәтеңке, жап-жаңа сөмке, тап-таза дәптерлер және жүректегі үлкен үміт – мұның бәрі оларға қуаныш сыйлайтыны анық.
«Бала үшін жаңа оқу жылы – тек жаңа форма мен мектеп құралдары ғана емес. Бұл – өзіне қамқорлық жасалып жатқанын сезіну, жанында қолдайтын жандардың бар екенін білу және жаңа білім мен армандарға қарай сеніммен қадам басу», – дейді «Жан-Сая» дағдарыс орталығы директорының орынбасары Татьяна Мидо.
Айта кетсек, «Жан-Сая» тұрмыстық зорлық-зомбылықтан зардап шеккен әйелдер мен балаларға кешенді көмек көрсетеді. Жұмысын бастаған 2017 жылдан бері мұнда 1 200-ден астам әйел мен 2 295 бала әлеуметтік қызметтер алды.
Нұржамал ӘЛІШ