АҚШ ішкі істер министрлігі Мексика шығанағының атауын ресми түрде Америка шығанағы деп өзгерту туралы шешім қабылдады. Бұл жаңалық министрліктің ресми сайтында жарияланып, оның ел экономикасы мен ұлттық қауіпсіздігі үшін маңыздылығы баса айтылды, деп хабарлайды aqshamnews.kz
Министрлік мәліметінше, бұл су жолы АҚШ-тың сауда, энергетика және теңіз өнеркәсібінің стратегиялық бөлігі саналады. Шығанақ жағалаулары мұнай және табиғи газ өндірісі, сондай-ақ, ірі порттар арқылы халықаралық сауда ағыны үшін ерекше маңызға ие. Атауды өзгерту АҚШ-тың осы аймақтағы басымдығын көрсету және шығанақтың ел мүддесіне сәйкес келетінін атап өту мақсатында жүзеге асырылған.
Бұл шешімге қатысты әртүрлі пікірлер айтылуда. Бірқатар сарапшылар мұндай атау өзгерту Мексикамен тарихи және географиялық байланыстарды елемеуге әкелуі мүмкін деген алаңдаушылық білдірді. Дегенмен, АҚШ билігі шығанақтың жаңа атауы оның ел үшін экономикалық және стратегиялық маңыздылығын көрсетуге бағытталған деп отыр.