Журналистер Медеу ауданындағы №33 мектепке барып, ондағы жөндеу жұмысын көрді. Жаңарған ғимарат ауданның білім беру инфрақұрылымын кеңейтіп, жаңғыртуды көздейтін бағдарламаның бір бөлігіне айналды, деп хабарлайды aqshamnews.kz
«Ауданда білім беру саласында 48 мекеме жұмыс істейді, олардың 28-і мемлекеттік те, 20-сы – жеке меншік. Қазір бұларда шамамен 36 мың оқушы білім алып жатыр. Әлі де 4 500 оқушы орны жетіспей тұр. Осы тапшылықты кезең-кезеңмен азайту мақсатында жаңа мектеп салып, бар мекемелерге қосымша құрылыс салуды қолға алып жатырмыз», - деді Медеу ауданы әкімінің орынбасары Асқар Нұрлыбаев.
Қазір екі мектепте күделі жөндеу жұмыс жүріп жатыр. №161 мектептегісі оқу жылының басына дейін аяқталмақ. Сондай-ақ, Самал шағын ауданындағы №30 мектеп «Кәсіпкерлік мектебі» жобасымен бірігіп, қосымша 400 орын пайда болады. Құрылыс жұмыс 2026 жылдың қыркүйек айында аяқталса, білім беру жобасы 2025 жылдың соңына дейін бітпек.
Осы жылдың қыркүйегіне дейін Құлжа тас жолының оңтүстігінде 2 000 орындық жаңа мектеп салынып бітеді. 599 орындық жеке мектептің құрылысы да жүріп жатыр. «Думан» шағын ауданында 1 200 орындық мене Халиуллин көшесінде 300 орындық тағы екі жеке мектептің құрылысы басталмақ. Осылайша, келер жылдың соңына дейін ауданда 4 099 жаңа оқушы орны пайда болмақ.
Жаңа ғимараттардан бөлек, қолданыстағы мектептерді кеңейту жұмыстары да жүргізіліп жатыр. Биылдың соңына дейін №35, №99 мектеп пен НЗМ-дегі қосымша құрылыс жұмысы аяқталып, бұл 870 жаңа орын жасауға мүмкіндік береді. Қараша айында №131 мектепке қосымша құрылыс басталады, оның аяқталуы 2026 жылға жоспарланған. Сонымен қатар, №168 мектепке 300 орындық қосымша құрылыс салатын жоба құжаттамасы әзірленіп жатыр.
Мектепке дейінгі білім беру саласы да кезең-кезеңімен дамып келеді. 2024 жылдан бастап ауданда 738 орындық 14 жеке балабақша ашылды. 2025 жылдың соңына дейін тағы 500 орындық 10 балабақша ашылмақ. Тамыз айында №195 балабақшаның күрделі жөндеуі аяқталып, оның сыйымдылығы 140 орынға артқалы отыр. №110, 157, 166 мен 196 балабақша жөндеуден өтіп жатыр, ол жұмыс 2025 жылдың тамыз айында аяқталады.