Медеу ауданы сапалы инженерлік инфрақұрылыммен қамтамасыз ету мақсатында үлкен жұмыс істеп жатыр. Басты шаруаның бірі – аудан тұрғындарын, соның ішінде алыс және таулы шағын аудандарды орталықтандырылған сумен жабдықтап, су бұру жүйесіне қосу болып отыр. Өңірлік коммуникациялар қызметінің алаңында Медеу ауданының әкімі Еркебұлан Оразалин осылай деді.
Өткен жылдың қазан айынан бастап «Балқаш» резервуарынан «Мұзтау» шағын ауданына дейін 2,2 шақырым магистральдық желі тартыла бастаған. Жобаны іске асыруға 574 миллион теңге бөлінді. Жобаның соңына таман 2 000 адам таза ауыз сумен қамтамасыз етіледі. Жұмыс 2025 жылдың қыркүйегінде аяқталып қалады.
«Каменское плато» шағын ауданына ерекше назар аударылып отыр. Өткен жылы мұнда 6 артезиан ұңғымасы, 12 сорғы, 7 резервуар салынып, 6,1 шақырымдық магистральдық желі тартылды. Биыл жалпы ұзындығы 50 шақырым болатын тарату желісінің құрылысы басталды. Бұл шағын аудан тұрғындарын таза ауыз сумен тұрақты қамтамасыз етуге мүмкіндік бермек. Құрылыс 2026 жылдың қыркүйегінде аяқталады.
Қосымша «Атырау», «Алатау», «Горный гигант» пен «Малая Станица» шағын аудандарында да ауқымды жобалар іске асырылады. Бұл аумақтарда 21 шақырым су құбыры мен 45,2 шақырым кәріз желісі салынып жатыр. Соның арқасында Медеу ауданындағы 21 мыңнан астам тұрғынның алғаш рет орталықтанған суға қолы жетіп, су бұру жүйесіне қосылғалы отыр.