2026 жылғы 1 сәуірде Мәжіліс депутаттары арнайы мемлекеттік органдардың қызметіне қатысты заң жобасын бірінші оқылымда мақұлдады. Құжатта экстремизм мен терроризмге қарсы күрес мәселесіне ерекше назар аударылған, – деп хабарлайды aqshamnews.kz тілшісі.
Заң жобасы аясында экстремизм мен терроризмнің алдын алу шараларын күшейту ұсынылып отыр. Атап айтқанда, экстремизмнің туындауына және таралуына ықпал ететін себептер мен жағдайларды анықтау, зерттеу және жою қарсы іс-қимыл міндеттерінің қатарына енгізілмек.
Сондай-ақ құжатта экстремистік және террористік материалдарды сақтауға тыйым салу нормасы қарастырылған. Бұл бастама елдегі қоғамдық қауіпсіздікті күшейтіп, құқық бұзушылықтардың алдын алуға бағытталған.
Жалпы заң жобасы арнайы мемлекеттік органдар қызметінің тиімділігін арттыруға, құқықтық олқылықтарды жоюға және ұлттық қауіпсіздік саласындағы заңнаманы жетілдіруге арналған. Сонымен бірге мемлекеттік құпияларды қорғау деңгейінің төмендеуі ұлттық қауіпсіздікке төнетін қатердің бірі ретінде заңнамалық деңгейде бекітілмек.
Бұдан бөлек, жоба арнайы органдардың жедел бөлімдеріне қызметке қабылдау кезіндегі жас шектеуін алып тастауды және әскери, арнайы оқу орындарында оқуға жұмсалған мемлекет шығындарын белгілі бір жағдайда жеңілдетілген тәртіппен өндіруді көздейді.
Депутаттар осыған ілеспе заң жобасын да бірінші оқылымда қолдады. Онда мемлекеттік құпияларды қорғау талаптарын қайта бұзғаны үшін жауапкершілікті күшейту және Мемлекеттік күзет қызметіне қосымша өкілеттіктер беру қарастырылған.