Сенат төрағасы Мәулен Әшімбаев Президенттің саяси реформаларын "сингуляр нүкте" деп атап, бір палаталы Парламент құру бастамасының тарихи маңызын түсіндірді. Оның айтуынша, бұл ұсыныс - орталықсыздандыру үдерісін жеделдетіп, өкілді билікті күшейтудің және әділетті саяси жүйе қалыптастырудың қисынды жалғасы.
Қазақстан Парламентіне 30 жыл толуына орай Сенат төрағасы Мәулен Әшімбаев көлемді талдамалық мақала жариялады. Онда ол Мемлекет басшысы Қасым-Жомарт Тоқаевтың елді жаңғырту саясаты мен жаңа форматтағы Парламент құру бастамасын егжей-тегжейлі талдады.
Мәулен Әшімбаев Президент ұсынған бір палаталы Парламент тұжырымдамасын "Әділетті Қазақстан" құру жолындағы жаңа кезең деп атады. Оның пікірінше, бұл қадам өкілді институттарды күшейтіп, биліктің жеке тұлғалардың қолында шоғырлану қаупін азайтады және саяси плюрализм кеңістігін кеңейтеді.
"Президенттің бастамасы шамадан тыс орталықтанған басқару жүйесін біртіндеп жойып, қоғам мүддесі ескерілетін теңгерімді бәсекелі жүйе құруды көздейді", – деді Сенат төрағасы.
Мақалада ол бір палаталы Парламент тек техникалық өзгеріс емес, "Күшті Президент – ықпалды Парламент – есеп беретін Үкімет" қағидатына негізделген реформалардың жалғасы екенін атап өтті.
Әшімбаев сондай-ақ Парламенттің 30 жыл ішіндегі рөлін, Сенаттың ел тұрақтылығын қамтамасыз етудегі миссиясын және цифрлық демократия дәуірінде өкілді биліктің жаңа форматта жұмыс істеу қажеттігін ерекше атап өтті.
"Электрондық үкіметтен электрондық Парламентке дейін бір-ақ қадам. Жасанды интеллект пен цифрлық технологиялар заң шығару процесінің ашықтығын және тиімділігін арттырады", – деді ол.
Сенат төрағасының айтуынша, реформаның түпкі мақсаты – ықпалды, көп партиялы, жоғары технологиялық және халық үніне құлақ асатын жаңа Парламент құру.
Мәулен Әшімбаевтың мақаласы - президенттік реформалардың идеологиялық әрі институционалдық түсіндірмесі, онда ол Қазақстан парламентаризмінің эволюциясын, Сенаттың тарихи рөлін және болашақ цифрлық Парламент моделін тұтас қарастырады.