Соңғы жылдары матча шайы денсаулыққа пайдалы супер сусын ретінде кеңінен танылып келеді. Жоғары антиоксиданттық қасиеті мен сергітетін әсері арқасында бұл шай фитнес әуесқойлары мен дұрыс тамақтануға мән беретіндердің сүйікті сусынына айналды. Алайда диетологтардың пікірінше, матчаның пайдасымен қатар, белгілі бір адамдар үшін қауіп-қатері де бар.
Матча дегеніміз не?
Матча — жапон шайының ерекше түрі. Ол көк шай жапырақтарының ұнтақталған түрінен дайындалады. Кәдімгі шайдан айырмашылығы — матчада жапырақ түгелдей тұтынылады, бұл оның құрамындағы пайдалы заттардың мөлшерін едәуір арттырады.
Матчаның пайдасы
Диетолог Римма Мойсенконың айтуынша, дені сау адамдар үшін матча қауіпсіз, тіпті пайдалы:
• Құрамында антиоксиданттар, аминқышқылдары және ақуыздар мол;
• Зат алмасуды жақсартады;
• Жүйке жүйесін сергітеді;
• Қан қысымын тұрақты деңгейде ұстауға көмектеседі.
Кімдерге қауіпті?
Матчаны кейбір адамдарға ішуге болмайды. Әсіресе:
• Гастрит, дуоденит, холецистит сияқты асқазан-ішек аурулары бар адамдар;
• Қан қысымы тұрақсыз, яғни гипотония немесе гипертония ұстамалары бар адамдар;
• Өт қабы ауыратындар.
Маманның айтуынша, матчаның құрамындағы кофеин қан қысымының кенет өзгеруіне алып келуі мүмкін. Сонымен қатар, ол өттің жылдам бөлінуін ынталандырып, ішкі ағзаларда ауырсынуды күшейтеді. Мұндай реакция күтпеген гипертониялық ұстамамен аяқталуы ықтимал.
Матча — пайдалы сусын. Бірақ кез келген өнім секілді оны да жеке ерекшеліктерді ескере отырып тұтыну керек. Денсаулығыңызға сенімді болмасаңыз, дәрігермен кеңесіп барып ішкен жөн. Пайда аламын деп зиян шегіп жүрмеңіз.