Партиялық мобильді қосымша іске қосылады
Nur Otan партиясының атқарушы хатшысы Асхат Оралов мәслихаттардағы "нұротандық" депутаттардың рейтинг нәтижесін жұртшылыққа жария ету керектігін айтты, деп хабарлайды Almaty-akshamy.kz
«Партияның жұмысы барынша ашық болуы тиіс деп санаймыз. Бүгінгі таңдағы қоғамның аса өзекті сұраныстарының бірі – партияның ашықтығы және халыққа жақын болуы», - деді ол партияның кезектен тыс съезінде.
Сондай-ақ Асхат Оралов пилоттық жоба ретінде мәслихаттардағы Nur Otan депутаттарының рейтинг жүйесі толықтай сынақтан өткенін айтты.
«Оның нәтижесін жұртшылыққа жария етуді ұсынамыз. Сонымен қатар партиялық мобильді қосымша іске қосылады. Онда азаматтар партияның жұмысы туралы жедел ақпарат алып, қоғамдық маңызды мәселелерге байланысты түрлі сауалнамаларға қатысып, өтініш пен ұсыныс-тілектерін қалдыра алады», - деді партияның атқарушы хатшысы.