Мәскеуде қар жамылғысы 80 см-ге жетіп, соңғы 72 жылдағы метеобақылаулар бойынша рекорд орнатылды.
Бұл деректі М. В. Ломоносов атындағы Мәскеу мемлекеттік университетінің метеорологиялық обсерваториясы анықтады, - деп хабарлайды aqshamnews.kz.
19 ақпан түнінде Адриатика теңізінен жеткен циклон әсерінен қалада қар жауды. Сол тәулікте Внуково ауданында жауын-шашын мөлшері ең көп түскен әлемдегі бес аймақтың қатарына енді. Қатты қар мен жел салдарынан Мәскеу мен Подмосковьеде ауа райының «қызғылт сары» қауіптілік деңгейі жарияланған болатын, кейін «сары» деңгейге төмендетілді.
Қар тазалау жұмыстарына қаланың коммуналдық техникасының толық паркі жұмылдырылып, негізгі магистральдар, көшелер, жаяу жүргіншілер аймақтары мен аулалар тазартылды. Көпқабатты үйлердің шатырлары мен қасбет элементтері қар мен мұздан тазартып, қауіпсіздік үшін жұмыс аймақтары қоршалды.
Қалада 40 рейс, оның ішінде 7 шетелдік әуе компаниясының рейсі тоқтатылды, 8 ұшақ қосалқы әуеайлақтарға қонды. Кешкі уақытта Мәскеу жолдарында кептеліс деңгейі 10 балдық шкала бойынша 9 балға жетті.
Теміржол желісінде шамамен 2 мың шақырым жол қардан тазартылып, 1,7 мыңнан астам адам мен 103 арнайы техника бірлігі жұмысқа тартылды. Штаб үйлестіруімен қар тазалау жұмыстары тәулік бойы жүргізілуде, ал қаладағы ауыр жүк көліктеріне көмек көрсету үшін тартқыштар мен автокрандар дайын тұр.