Орман қоры мен жануарлар әлеміне үлкен зиян келді
ҚР марламенті мәжілісінің депутаттары Қостанай облысындағы өрттен зардап шеккендерге бір күндік табысын аудару туралы шешім қабылдады, деп хабарлайды Almaty-akshamy.kz.
Қостанай облысының тұрғындары бұрын-соңды болмаған қайғылы жағдай – өртке тап болды. Өкінішке қарай, қайтыс болған адам бар.
«Жүздеген үйлер мен өндірістік нысандар қирады. Орман қоры мен жануарлар әлеміне үлкен зиян келді. Қазір уәкілетті органдар барлық қажет шараны қабылдап жатыр. Мемлекет басшысы жағдайды жеке бақылауда ұстап отыр», - делінген парламент мәжілісінің хабарламасында.
Осындай ауыр кезеңде барлық қазақстандыққа қостанайлықтармен бірге болып, қолдан келгенше көмек көрсету маңызды деді мәжілісмендер. Сонымен қатар мәжіліс депутаттары марқұмның туған-туыстарына көңіл айтып, зардап шеккендердің тезірек сауығып кетуіне тілектес екенін жеткізді.
«Осыған байланысты парламент мәжілісі Қостанай облысында өрт салдарынан зардап шеккендерге бір күндік жалақысын аудару туралы шешім қабылдады. Мәжілісмендер мен Аппарат қызметкерлері марқұмның туған-туыстарына көңіл айтып, зардап шеккендердің тезірек сауығып кетуін тілейді», - дейді Мәжіліс депутаттары.