Алматыда 15-16 сәуір күндері «Almaty theatre» сахнасында «Шідер» қойылымының премьерасы көрерменге жол тартады. Бұл туынды Қазақстандағы алғашқы детектив-драма ретінде ұсынылып отыр, – деп хабарлайды aqshamnews.kz тілшісі.
Қойылымның өзегінде махаббат пен парыз арасындағы тартыс жатыр. Шығармада бір дәуірдің перзенттері Қосан мен Ақжанның тағдыры суреттеледі. Оларды табыстырған – Алматының ыстық көшелері, ал айырған – өмірдің күрделі жолы. Бірі ел үшін үнсіз қызмет еткен барлаушы болса, екіншісі – мемлекет қауіпсіздігін шетте жүріп қорғаған азамат.
Спектакльде екі егемен елдің мүддесі, барлау әлемінің құпиясы, жеке сезім мен ел алдындағы жауапкершілік арасындағы күрес көрініс табады. Туынданың негізгі идеясы – ел тағдыры мен адам жанының нәзік иірімдерін қатар ашу.
Қойылым авторы – Бақытжан Қаратегі. Сахналық нұсқасын Мирас Әбіл әзірлеген. Ал режиссері – Қазақстанда ғана емес, ТМД кеңістігінде де танымал суреткер Әлібек Өмірбекұлы. Ұйымдастырушылардың айтуынша, спектакль жастардың патриоттық рухын көтеріп, өнерге деген қызығушылығын арттыруға бағытталған.
Басты рөлдерді Қазақстанның еңбек сіңірген қайраткері Айнұр Болат пен «Құрмет» орденінің иегері Ержан Нұрымбет сомдайды. Қойылымның жанры – детектив-драма, ұзақтығы 2 сағат, жас шектеуі – 16+.
Премьера 15-16 сәуір күндері сағат 19:00-де «Almaty theatre» ғимаратында өтеді. Мекенжайы: Әл-Фараби даңғылы, 30.
