Мәдениет және спорт министрлігінің барлық қызметкері бір мезетте, Мемлекеттік Әнұранды орындады
4 маусым – Қазақстан Республикасының Мемлекеттік рәміздер күні - азаматтық біртектілікті, ұлтжандылық пен бірлігімізді нығайтатын мерекенің бірі.
Мемлекеттік рәміздер күні мерекесіне орай бекітілген іс-шаралар жоспарына сәйкес, бүгін Мәдениет және спорт министрлігінің барлық қызметкері бір мезетте, карантин талаптарын сақтай отыра, Мемлекеттік Әнұранды орындады, деп хабарлады Almaty-akshamy.kz министрліктің баспасөз қызметіне сілтемелеп.
Айта кетейік, аталған іс-шара барлық министрлікте өткізілді.
Анықтама:
«Қазақстан Республикасының Мемлекеттік рәміздері туралы» Заңы 2007 жылы 4 маусымда қабылданды. Осы Заңға сәйкес, жыл сайын 4 маусым Қазақстан Республикасында Мемлекеттік рәміздер күні ретінде мерекеленеді.
Былтыр Мемлекет басшысының тапсырмасына сәйкес, Мемлекеттік Туын және Елтаңбасын және олардың бейнелерін, Мемлекеттік Гимнінің мәтінін пайдалану қағидаларына өзгерістер енгізілді.
Енгізілген өзгерістердің нәтижесінде азаматтарымыз үшін Мемлекеттік Туды пайдалану аясы заңнамалық тұрғыда кеңейтіліп отыр.
Атап айтқанда, Мемлекеттік Туды жеке және заңды тұлғалар ғимараттарда (тұрғын үйлерде және тұрғын емес үй-жайларда), оның ішінде балкондарда және салтанатты іс-шаралар өткізілетін орындарда патриоттық сезімдерін, қазақстандық бірегейлігін білдіру, елдің, оның азаматтарының жетістіктерін қолдау мақсатында пайдалана алады.
Сонымен қатар жеке тұлғаларға осы Қағидаларға енгізілген өзгерістерге сәйкес, Мемлекеттік Туын бір қабатты және (немесе) көп қабатты ғимараттарда экстерьерлі нұсқада орналастыру кезінде ғимараттың сәулет ерекшеліктеріне қарамастан пайдалану мүмкіндігі берілді.
Жалпы алғанда, жоғарыда көрсетілген өзгертулер еліміздің Туының қолданылу аясын едәуір кеңейтеді, оның қоғамдағы патриотизм рухын нығайтуға бағытталған символдық капиталын жаңаша ұғынуға мүмкіндік береді.