Тәуелсіздік мерекесіне орай Алматы қаласы ҚАЖ департаментіне қарасты №11 мекемесінің жеке құрамы қоғам белсендісі, Желтоқсан қатысушысы, «Желтоқсан ақиқаты» республикалық қоғамдық бірлестігінің мүшесі Арип Қабылановпен жүздесті.
Арип Смайылұлы сонау 1986 жылғы желтоқсанда көзімен көрген оқиғаларымен бөлісіп, сол кезеңнің ащы шындығын әңгімелеп, қазақ жастарының азаматтығын айтып толғанды. Желтоқсан оқиғасының ақырында бабаларымыз армандаған тәуелсіздікке қол жеткізгенімізді, дегенмен, осы жолда талай боздақтың шейіт болғандығын атап өтті. Жастарды осынау егемендіктің қадірін білуге, отаншыл, патриот болуға шақырды.
№11 мекемесінде жазасын өтеп жатқан жасөспірімдер Тәуелсіздік күніне арналған өлеңдерін мәнерлеп оқыды. Сондай-ақ, олардың назарына интерактивті тақтадан Желтоқсан туралы слайдттар ұсынылды.
– Еліміздің егемендігін дәріптейтін, бойға қайрат, жүрекке рух беретін жан тебіретерлік жыр жолдары, желтоқсанның ызғарын бейнелейтін фильмдер жүректерге жол тапты деп ойлаймын. Тарихи маңызы зор бұл іс-шара бізде жазасын өтеп жатқан жастар үшін тәрбие. Біз өзімізге өмірі үлгі азаматтарды жиі шақыратынымыз да сондықтан. Әр баланы түзу жолға бағыттай білсек – ең үлкен жетістік сол болмақ, – деген мекеме бастығы, әділет полковнигі Алмат Сүлейменов Желтоқсан қатысушысы Арип Қабылановқа мекеме ұжымы атынан алғыс білдірді.