Алматыда қазақстандық шеберлерді, кәсіпкерлерді және халықаралық кәсіби қауымдастық өкілдерін біріктірген екі күндік қолөнершілер жәрмеңкесі аяқталды, – деп хабарлайды aqshamnews.kz тілшісі.
Қатысушылар өнімдерін таныстырып, жаңа сатып алушылар тауып, іскерлік байланыс орнатты.
Жәрмеңке 31 қазан мен 1 қараша аралығында «Атакент» көрме орталығында өтті. Келушілер назарына авторлық әшекейлер, киізден, былғары мен аң терісінен жасалған бұйымдар, керамика, экологиялық таза ойыншықтар және сәндік-қолданбалы өнер туындылары ұсынылды. Бағдарлама аясында шебердің сабақтары өтіп, дәстүрлі қолөнер әдістері көрсетілді.
Екі күн ішінде шеберлер туындыларын сатып, жаңа тұтынушылар тапты. Мәселен, зергер Леонид Шкляев қолдан жасалған әшекейлерге сұраныстың жоғары болғанын атап өтті. Ал батик өнерінің шебері Ирина Гамблевская 20-дан астам бұйымын сатты.
Іс-шараға түрлі елдердің кәсіби қауымдастықтарын біріктіретін Дүниежүзілік қолөнер кеңесінің (World Crafts Council) өкілдері де қатысты. Бұл тәжірибе алмасуға, қазақстандық қолөнер бұйымдарын шетел нарығында ілгерілетуге және шетелдік шеберлермен ынтымақтастықты дамытуға қосымша мүмкіндік берді.
Жәрмеңке барысында отандық қолөнершілердің бұйымдарын насихаттауға және жаңа сатып алушылар табуға арналған «Шебер» цифрлық платформасы да таныстырылды.
Іс-шара соңында қатысушыларға қолөнер өнерін дамытуға және ұлттық дәстүрді сақтауға қосқан үлесі үшін алғыс хат табысталды.
Жәрмеңке қала әкімдігінің қолдауымен Алматы туризм бюросының бастамасымен ұйымдастырылды.