Жаздың шіліңгір ыстығы тек адамдарға емес, темір тұлпарларға да әсер етеді. Көліктің қатты қызып кетуі оның істен шығуына әкелуі мүмкін. Aqshamnews.kz тілшісі көлікті аптаптан қорғайтын бес кеңес ұсынады.
1. Көлікті көлеңкеге немесе жабық тұраққа қойыңыз
Күннің астында көлік салонында температура 60-70 градусқа дейін жетуі мүмкін. "Қайнап" тұрған көлікке отыру мүмкін емес. Егер көлеңке таппасаңыз, алдыңғы терезеге шағылыстырғыш жапқыш (солнцезащитный экран - еск.) қойғаныңыз жөн. Бұл салон температурасын 10-15 градусқа дейін төмендетеді.
2. Салонды желдетіп алып отырыңыз
Көлікке отыра салысымен кондиционерді қосуға асықпаңыз. Алдымен есіктер мен терезелерді ашып, бірнеше минут желдетіңіз. Сонда кондиционерге де ауырлық түспейді.
3. Кондиционерді дұрыс пайдаланыңыз
Кейбір жүргізушілер кондиционерді ең төменгі температураға қойып, кейін ауырып жатады. Денсаулыққа кері әсерін тигізбес үшін оны салондағы ауа температурасын баяу түсіру қажет.
4. Көлікке арналған салқындатқыш құрал немесе желдеткіш қолданыңыз
Қазір көлік салонына арналған шағын желдеткіштер мен салқындатқыш құрылғылар бар. Олар жүргізушінің ыстығы басылғанша көмектесе алады. Тағы бір лайфхак - мұз салынған бөтелкені де еденге қойыңыз, бұл аптапта көмегін тигізеді.
5. Жолға шығарда өзіңіз де, көлігіңіз де дайын болсын
Қатты ыстықта ұзақ жолға шығар алдында дөңгелек қысымын, қозғалтқыштағы су мен май деңгейін тексеріңіз. Сусыз жүрмеңіз. Қауіпсіздік үшін ыстықта көлік ішінде оттық, бензин құйылған пластик канистр, уайт-спирит сияқты еріткіштер, бояу немесе газ баллондарын әсіресе күн астында қалдырмаңыз.