Қазақтың күнтізбелік атауында күні бүгінге дейін орнын таппай адасып жүрген ай атаулары жоқ емес. Жаратылысты зерттеп жүрген ғалымдар мен этнографтар арасында осы орайда бұрыннан қалыптасқан екі түрлі жаңсақ пікір қалмай келеді.
Ақпан айының қыстың дәл қай айына жататынын дөп басып айта алмай келеміз. Яғни ақпан айы қазіргі февраль айы ма, әлде қазіргі январь ма, нақты ешкім білмейді немесе білгісі келмейді. Әйтпесе, шешімін таба алмай келе жатқан осы дау-дамай мен қарама-қайшылықты шешуге негіз жоқ емес..
Мәселен, Ғабит Мүсірепов: «Қазақ қаңтар-ақпан деп еш уақытта да айтпайды, ол тіліміздің сөйлеу дәстүрін бұзар еді. Біз ылғи ақпан-қаңтар деп сөйлейміз. Сондықтан мен осы екі айдың аттары ауысып тұр ма деймін» деп айтыпты бір сөзінде.
Ал Мұхтар Әуезов шығармаларында «ақпан-қаңтардағы күйіне келген бурадай» деп сөз қолданады. Қос кемеңгердің осы парасатты пайымдарына мән беретін болсақ, январь (ақпан), февраль (қаңтар) болса керек.
Орайы келгенде айта кетейік, Көкек өз орнын таппай жүрген ай. Кезінде компартияның кежір, солақай саясатының құрбаны болған атау. Лениннің «Апрель тезистерін» газетке бергенде «Көкек тезистері десек пролетариаттар көсемін мазақ еткен боламыз, тақырыпты «Сәуір тезистері» деп өзгертіңдер» деген орталық комитеттің мәжбүрлеуімен жазылған.
Қазір Ленин де, партия да, оның кеңес өкіметі де келмеске кетті. Тезистер де мәнін жоғалтты. Ал ай атауы сәуір болып қалды. Көкекке өз мәртебесін беретін кез келді. 30 жылдан астам уақыттан бері тәуелсіз елміз.
Қоғамымыз өзгеріп жатыр. Жаңа Қазақстан құру жолында құлшыныс үстіндеміз. Өзге өркениетті елдер сияқты өзімізге ғана тән ұлттық құндылықтарымызды құнттағанымыз, бабалар жолын ұмытпағанымыз жөн емес пе?