Тұрғын үйлердегі кіреберістер, баспалдақ алаңдары мен аулалар – ортақ пайдалануға арналған орындар. Сондықтан ол жерлерде балалар арбасы, велосипед, жиһаз секілді жеке заттарды сақтауға болмайды. Мұндай әрекет үшін ҚР Әкімшілік құқықбұзушылықтар туралы кодексіне сай айыппұл қарастырылған. Қандай айыппұл және бұл туралы заңгер не дейді? Толығырақ Аqshamnews.kz материалында.
1. Өрт қауіпсіздігі ережесін бұзу
Егер жеке заттар (арбалар, велосипедтер және т.б.) эвакуация жолдарына кедергі келтірсе, бұл өрт қауіпсіздігі талаптарын бұзу ретінде саналады.
- ҚР ӘҚБК 410-бабына сәйкес – 5 АЕК (19 660 теңге) көлемінде айыппұл салынады.
- Егер бір жыл ішінде қайталанса – 10 АЕК (39 320 теңге).
Заңгер Ержан Болатбектің айтуынша, 2022 жылғы 21 ақпандағы №55 бұйрықпен бекітілген Өрт қауіпсіздігі қағидаларына сәйкес, эвакуациялық есіктер мен жолдарды ешқандай затпен жабуға немесе тарылтуға болмайды. Өрт кезінде бұл адамдардың қауіпсіз шығуына кедергі келтіруі мүмкін.
2. Өртке қатысы жоқ орындарда тұрған жағдайда
Егер арба немесе велосипед өрт жолдарына кедергі келтірмейтін жерде тұрса, бірақ тұрғындардың арызы негізінде шағым түссе, ҚР ӘҚБК 505-бабы бойынша жауапкершілік қарастырылады:
- 20 АЕК (78 640 теңге) айыппұл.
3. Қоқыс шығарып қойған жағдайда
Кіреберіске немесе ортақ аумаққа қоқыс қойғандар ҚР ӘҚБК 434-2 бабына сәйкес жазаланады:
- Бірінші рет – 10 АЕК (39 320 теңге),
- Қайталанса – 20 АЕК (78 640 теңге) айыппұл.
Заңгердің айтуынша, егер осындай әрекет салдарынан біреудің денсаулығына немесе өміріне қауіп төнсе, іс тіпті қылмыстық жауапкершілікке дейін барады.