Жатыр мойнының қатерлі ісігі - әйелдер арасында ең көп таралған онкологиялық аурудың бірі. Соңғы жылдары дәрігерлер 45 жастан асқан әйелдермен қатар, жас пациенттер арасында да ауру көрсеткішінің артқанын атап өтіп жатыр. Мамандар мұны халықтың аурудың алдын алуға деген жоғары жауапкершілігімен және профилактикалық тексеру, скринингтік бағдарламаға белсенді қатысуымен байланыстырады.
Алматы №36 қалалық емханасының онкологы Зарина Тойлыбаеваның айтуынша, емнің нәтижесі ауруды уақытылы анықтауға тікелей байланысты. Эндометрийдің қатерлі ісігі ерте кезеңде жақсы емделеді, емдеу барысы жеңіл өтеді және өмір сапасын сақтауға мүмкіндік береді. Ауру әдетте баяу дамиды - көбіне гормондық бұзылыс, артық салмақ, қант диабеті, артериялық гипертензия, аз қимылдау және тұқым қуалаушылыққа бейімділік аясында пайда болады.
Онколог гинекологқа тұрақты түрде қаралу қажет екенін атап өтті. Дәл осы профилактикалық тексеру мен кіші жамбас ағзаларының ультрадыбыстық зерттеуі патологиялық өзгерісті ерте кезеңде анықтауға мүмкіндік береді.
«Әйелдер денсаулығына мұқият болуы керек: етеккірдің бұзылуы, етеккір аралығындағы немесе менопаузадан кейінгі қан кету, іштің төменгі бөлігіндегі ауырсыну байқалса, міндетті түрде маманға қаралу қажет», - дейді Зарина Тойлыбаева.
Оның айтуынша, Қазақстанда онкоскринингтік бағдарламаға қатысудың жас диапазоны кеңейтілді. Енді тексеру тегін медициналық көмектің кепілдендірілген көлемі аясында тегін жүргізіледі және скринингтен өту үшін міндетті әлеуметтік медициналық сақтандыру полисінің болуы талап етілмейді.
«30 жастан 74 жасқа дейінгі әйелдер жатыр мойны обырына, 40 пен 76 жас аралығындағы әйелдер сүт безі обырына, ал 50 мен 76 жас аралығындағы ерлер мен әйелдер тоқ ішек обырына скринингтен өте алады», - деп нақтылады маман.
Профилактикалық тексеру тіркелген емханада өткізіледі. Қатысу үшін учаскелік дәрігерге немесе профилактикалық бөлімге жүгіну жеткілікті.
Онколог ерте диагностика өмірді сақтайтынын атап өтті: «Уақытылы профилактикалық тексеру ауру белгілері пайда болмай тұрып анықтауға және емнің тиімдігін айтарлықтай арттыруға мүмкіндік береді. Өзіңе деген қамқорлық - өз денсаулығыңа назар аударудан басталады», - деп сөзін түйіндеді ол.