2025 жылдың алғашқы ірі ат жарысы Дубайда өтті, деп хабарлайды Aqshamnews.kz
Қазақстандық Тілек Мұханбетқалиевтің танымал сәйгүлігі Кабирхан 12 тұлпардың арасында 7-орынға тұрақтады. Өкінішке орай, қаржылай сыйақы тек алдыңғы 6 орынға табан тіреген тұлпарларға ғана беріледі,
Дубайдағы бұл жарыс әлемдегі ең беделді ат бәйгелерінің бірі саналады. Онда 30 миллион доллар көлемінде жалпы сыйақы қоры бөлінген. Қазақстанның атынан бірнеше тұлпар қатысқанымен, олардың ешқайсысы жүлделі орынға іліге алмады. Дегенмен, қазақ сәйгүліктерінің осындай халықаралық деңгейдегі додаларға қатысуы ұлттық ат спорты үшін үлкен жетістік ретінде бағалануда.
Атбегі Қанат Мединов бұл нәтиженің маңыздылығын ерекше атап өтті:
"Эмиратта ұшқыр бәйге жақсы дамыған. Біздің Алматы бәйгесі де жақсы көрсетіп жатыр. Биыл былтырмен салыстырғанда 15 жаңа тұлпар жарысқа қатысты. Қазақстан атынан. Тілек ағамызға рақмет. Осылай дамытып, жол ашқан сол кісі".
Қазақ даласында тұлпарлар ежелден ұлттың мақтанышы мен серігі болғаны белгілі. Қазіргі таңда Қазақстанда ат спорты қарқынды дамып келеді. Соңғы жылдары отандық атбегілер мен бәйгеге қатысатын тұлпарлардың саны артып, халықаралық жарыстарға қатысу көрсеткіші жоғарылап келеді. Дубай бәйгесіне қатысқан 15 жаңа сәйгүлік осының айқын дәлелі.
Тілек Мұханбетқалиевтің Кабирхан есімді сәйгүлігі соңғы жылдары беделді жарыстарда Қазақстанның намысын қорғап, танылып келеді. Бұл жолы жүлделі орынға ілікпегенімен, мұндай бәйгелерге тұрақты қатысу арқылы қазақ сәйгүліктерінің әлеуеті әлемдік деңгейде мойындалуда.
Дубай бәйгесі қазақ сәйгүліктері үшін үлкен тәжірибе болды. Жарыста жүлде алмаса да, Тілек Мұханбетқалиев пен оның командасының еңбегі ұлттық ат спортының дамуына қосылған маңызды үлес. Мұндай қадамдар болашақта қазақ тұлпарларының халықаралық додаларда жеңіс тұғырынан көрінуіне негіз болары анық.
