Артуш Карапетян – Қазақстанның жүзім шаруашылығын жаңғыртушы тұлға
"Вино, как и друг, чем старше, тем лучше" деген халық нақылын жақсы білетіндердің бірі – жүзім өсірушілер мен шарап өндірушілер. Осы сөздердің астарын терең түсінген Артуш Карапетян бүгінде 80 жасқа толып отыр. Ол Қазақстанда ғана емес, әлемдік деңгейде танымал Winnac Elite компаниясының негізін қалап, жүзім шаруашылығының дамуына зор үлес қосқан кәсіпкер.
Артуш Месропұлы Қазақстандағы ең беделді шарап жасаушылардың бірі. Өзінің айтуынша, шарап өндірудің ортақ қағидаларымен қатар, өзіндік құпиялары да бар. Ұзақ жылдар бойы жинақталған тәжірибесі оған шетелдік сапарларында осы білімді оңтайлы қолдануға мүмкіндік береді.
"Жүзім – тірі ағза. Ол да адам секілді ерекше күтімді қажет етеді. Жақсы өнім алу үшін тек жаңа технологиялар мен заманауи әдістер жеткіліксіз, оған адамгершілікпен қарау және сүйіспеншілік керек," – дейді Артуш Карапетян.
Қазақстанның климаты мен экологиялық жағдайы жүзімге кейде кері әсерін тигізуі мүмкін. Мұздатқыш жаңбыр, бұршақ, кенеттен суыған ауа райы өнім сапасын төмендетуі мүмкін. Осыған қарамастан, Артуш Месропұлы жүзімге дұрыс күтім жасаудың жолдарын меңгеріп, әртүрлі зиянкестермен күресудің және жүзімді дұрыс өңдеудің әдісін таба білді.
Winnac Elite – Қазақстандағы премиум-класс өнімдерін өндіретін жетекші компания. Компания Түркістан облысы Сайрам ауданында орналасқан 80 гектар жүзім алқабына ие. Мұнда заманауи итальяндық жабдықтар қолданылып, сапалы шарап, коньяк және басқа да сусындар дайындалады.
Компанияның ерекше өнімдері қатарында:
- "Менің Қазақстаным",
- "Еуразия",
- "Астана",
- "Қазақ хандығы",
- "Алматы" атты брендтік шараптар бар.
Бұл өнімдердің әрқайсысы қайталанбас дәмге ие және халықаралық байқаулардың жүлдегері атанған.
Кеңес заманында жүзім шаруашылығына үлкен залал келтірілді. Виноградниктер жойылып, бұл сала ұмыт болуға жақындады. Осындай қиын кезеңде Артуш Карапетян Қазақстанның оңтүстігіндегі жүзім алқаптарын сақтап, бұл саланы қайта жандандыруға кірісті. Ол өндіріс циклінің барлық кезеңдерін – жүзім өсіруден бастап дайын өнімді сатуға дейінгі жолды ұйымдастыра отырып, тұрақты әрі сапалы өндіріс құрды.
Шарап өндірісінде ерекше орын алатын бөшкелер Италия, Молдова және Армениядан арнайы әкелінеді. Әрбір бөшке 80 жылдан асқан ағаштан жасалады. Бұл тәсіл өнімнің сапасын арттыруға септігін тигізеді. Сонымен қатар, компания шараптарды емен бөшкелерінде 6 жылдан 12 жылға дейін сақтайды.
Сусындарды құюға арналған бөтелкелер Франциядан, ал қақпақтар Португалиядан жеткізіледі.
Winnac Elite өндірісінде қолданылатын заманауи желілер сағатына 6 мың бөтелке өнім шығаруға мүмкіндік береді. Барлық өндірістік кезеңдерде қатаң техникалық бақылау жүргізіледі.
Кәсіпорын өндірістен қалған жүзім сығындыларын топырақты тыңайтуға пайдаланып, экологияға оң әсер етуде. Сонымен қатар, қайта өңделген материалдарды косметикалық өнімдер, парфюмерия, лимонад және тыңайтқыштар жасау үшін қолдану жоспарланып отыр.
Артуш Карапетян өзінің еңбек жолын қарапайым жұмысшы ретінде бастаған. Кейін пивзавод директоры, одан әрі ірі өндірістік бірлестіктерді басқаруға дейін көтерілді.
"Жас миллионер болғысы келетін жастарға айтарым: жұмысты ең қарапайым мамандықтан бастаған жөн. Сонда ғана барлық сатыларды терең түсініп, үлкен жетістікке жетесің," – деп кеңес береді ол.
Артуш Месропұлы – Қазақстанның шарап жасау саласының алтын көпірі және жүзім шаруашылығының нағыз шебері. Оның еңбегі елімізде ғана емес, шетелдерде де жоғары бағалануда.
Тақырыпқа орай
Қазақстандық белгілі кәсіпкер, меценат және шарап жасау өнерінің шебері Артуш Карапетян 80 жасқа толды. Ол Алматы облысы Қаскелең ауданының «Жетісу» кеңшарында дүниеге келген. Профессор, экономика ғылымдарының кандидаты және Халықаралық жүзім шаруашылығы және шарап жасау академиясының (Франция, 2003 ж.) академигі. Артуш Месропұлы сегіз шарап түрінің авторы және патент иегері ретінде еліміздегі жүзім шаруашылығы мен шарап жасау саласының дамуына орасан зор үлес қосты. Оның еңбегі жоғары бағаланып, «Достық», «Құрмет» және «Парасат» ордендерімен марапатталған.
Артуш Месропұлының жастарға кеңесі
- Жүзім де адам сияқты: оған мейірім мен махаббат қажет.
- Жақсы өнім – еңбектің адалдығы мен табиғатқа құрметтің жемісі.
- Шарап жасау – бұл тек кәсіп емес, бұл өнер мен жүректің үйлесімі.
- Табыстың құпиясы – әр істі жүрекпен сезініп, адал атқаруда.
- Технология дамығанымен, жүзімге деген жанды көзқарас ешқашан ескірмейді.
- Егер табысты болғың келсе, жұмысты ең қарапайымнан баста.
- Әрбір бөтелке шарап – бұл табиғаттың, еңбектің және уақыттың тоғысқан сыйы.
- Жүзімнің дәмі жердің қасиетінен, ал шараптың сапасы адамның қолынан шығады.
- Өмірдегідей, шарапта да уақыт – сапаның басты кепілі.
- Дәстүр мен жаңашылдықты біріктіре білгенде ғана шынайы шеберлік туады.