Көлік министрлігі ҮАААЖ-ын (Үлкен Алматы айналма автомобиль жолы) пайдаланғаны үшін төлем жасамағандарға қандай шаралар қолданылатынын мәлімдеді, деп хабарлайды aqshamnews.kz
Бұған дейін жүргізушілердің ақылы Алматы автобанын пайдаланғаны үшін 3 миллиард теңгеден астам қарызы бар екені туралы хабарланған болатын. ҮАААЖ арқылы өту үшін төлем бойынша қарыздар негізінен жеңіл автокөлік иелеріне тиесілі.
Айта кетейік, ҮАААЖ ақылы автожолын пайдаланғаны үшін төлемді жолдан өткеннен кейінгі жеті күн ішінде төлеуге болады. Алдымен пайдаланушыларға банк қосымшаларында ҮАААЖ арқылы өту үшін қарыздың бар екендігі және оны өтеу қажеттілігі туралы хабарламалар жіберіледі. Содан кейін тиісті орган тарапынан айыппұлдар салынады. Сонымен қатар, төлем жасамағандарға Қазақстан Республикасынан шығуға шектеу қойылуы мүмкін.
Министрлік жүргізушілерге ҮАААЖ -ты пайдаланғаны үшін төлем жасамаса, не болатынын еске салды.
«Қарыз Қазақстан Республикасының заңнамасына сәйкес пайдаланушылардан өндіріліп алынады. Ақылы автомобиль жолдарымен өту үшін төлемді уақытында төлемеген жағдайда, Қазақстан Республикасының заңнамасында белгіленген тәртіппен әкімшілік іс қозғалатын болады және айыппұл салынады. Сонымен қатар, ҮАААЖ арқылы өту үшін қарызы бар пайдаланушыларға Қазақстан Республикасы шекарасынан автокөлікпен өтуге тыйым салу көзделген,» - деп хабарлады Көлік министрлігі.