Қырғызстанда жүргізуші куәлігін алу тәртібі мен оқу мерзімі өзгерді, деп хабарлайды, Aqshamnews.kz тілшісі.
Президент істері басқармасының мәліметіне сәйкес, 2026 жылдан бастап елдегі барлық жекеменшік автомектептер толықтай мемлекеттік бақылауға өтеді. Бұл шешім сыбайлас жемқорлықтың алдын алу мақсатында қабылданған. Енді B санаты бойынша жүргізушілер 10 ай (480 сағат), ал C санаты бойынша 12 ай оқиды.
Оқу бағдарламасына жол қозғалысы ережелері, автокөлік құрылымы мен техникалық қызмет көрсету, жол-көлік оқиғасы кезіндегі алғашқы медициналық көмек, қауіпсіз жүргізу негіздері, құқықтық және психофизиологиялық дайындық, сондай-ақ жүргізуші әдебі енгізілген.
Емтихан сұрақтарының саны 750-ден 2000-ға дейін артты. Теориялық емтиханды жасанды интеллект қабылдайды.
Жүргізуші курстарына онлайн өтінім «Тундук» платформасы арқылы қабылданады. Оқу құны, өтінім беру тәртібі және автомектептер тізімі келесі аптада жарияланбақ.
Сонымен қатар, Қырғызстанда 2026 жылдың 15 қаңтары мен 15 ақпаны аралығында ескі немесе мерзімсіз жүргізуші куәліктерін 10 жылға жарамды жаңа куәлікке тегін ауыстыру науқаны өтеді.
Айта кетейік, бұған дейін елде 2027 жылдың 31 желтоқсанына дейін автомектептерге лицензия беруге мораторий енгізілгені хабарланған.
