Мегаполистегі «Арман» кинотеатрында «Жұпар жүрек» көркем фильмінің тұсаукесері өтіп, еліміздің барлық кинотеатрының үлкен экранына жол тартты.
«Жұпар жүрек» – түрмеде отырып шыққан, ішкілікке жақын, қатыгез әрі абьюзер Саматтың (рөлде Ержан Нұрымбет) жүрек трансплантациясынан кейінгі өзгерістерін бейнелейтін психологиялық драма.
Жүрегінде ақауы бар оған жол апатынан көз жұмған жас жігіттің жүрегі салынады. Донор болған мұғалім жігіттің ата-анасы марқұм ұлының тым болмаса жүрегінің дүрсілін естігісі келіп Саматтың үйінің есігін қағады. Ал Самат болса ол қызметін ақшаға сатады. Баласын сарғая сағынып жүрген әке-шеше, әрине, бұл талапқа көнеді.
Арада біраз уақыт өткенде Самат өзіндегі елеулі өзгерістерді байқай бастайды. Ал оған донор болған жігіт өте мейірімді, құстарға үйшік жасауды жаны сүйген, ізгілікті мұрат еткен бастауыш сынып мұғалімі болатын...
– Фильм идеясы кеудесіне донордың жүрегі салынған адамның және оған өмір сыйлаған марқұмның туыстарының суретін көргенде туындады. Мен алдымнан шыға келген сол суретке біраз тесіліп қарап қалдым. Сол көріністің көркем фильмге сұранып тұрғанын ұқтым. Бұл – кинозалда попкорн жеп отырып көре салатын фильм емес, үлкенді де, кішіні де ойландыратын, адам болып өмір сүруге, жүректі сақтауға үндейтін, адамгершілікті дәріптейтін картина деп білемін. Мен бұл туындымда көп сөзге емес, сахналық іс-әрекеттерге көбірек мән бердім, – дейді «Жұпар жүрек» көркем фильмінің режиссері Максим Қодаров.
Кинокартина трансплантологияны ғана емес, адамның ішкі күресі, отбасындағы дағдарыс, тұрмыстық зорлық-зомбылық, балалар арасындағы буллинг мәселелерін де қозғайды.
Саматтың жары Фатима (рөлде Айнұр Бермұхамбетова) – еңбегіне адал қарапайым медбике. Күйеуінің барлық қатыгездігіне, сүйегінен өтер балағат сөздеріне, етіне батқан таяғына шыдап келе жатқан, ұлының бүтін отбасында өскенін қалайтын әйел. Ал кішкентай Мәди – бала болып жарқырап күлмейтін, әке мейірімін көрмеген, ылғи қатарластарының мазағына ұшырап жүретін, сурет салса да тек қара түсті бояуларға жақын балдырған.
Міне, кинокартина осындай шиеленісті сахналарға толы.
– Бұл – Максимнің тырнақалды дебюттік жұмысы. Түсірілім жұмыстары басталғанда оның айтқан сөздері әлі есімде. «Менің қағаздағы кейіпкерлерім тіріліп келе жатыр. Оларға сіздер жан бітіріп жатырсыздар» деп балаша қуанғаны бар. Әрине, барымызды салдық. Оның үстіне түсірілім алаңынан мықты оператор Қазбек Әміржановты көргенде қобалжу да азайып, жанып сала бердік. Бұл – әлеуметтік-психологиялық драма. Жүрек донорлығынан басталған оқиға талай жүрекке ой салады деп сенемін. Ендігі бағасын өздеріңіз бересіздер, қымбатты көрермендер! – дейді отандық белгілі актер Бақытжан Әлпейісов.
Фильмді «Алижанфильм» студиясы Мәдениет және ақпарат министрлігінің қолдауымен түсірген. Атқарушы продюсер – Арман Боранбаев, режиссері және сценаристі – Максим Кодаров, қоюшы-оператор – Қазбек Әміржанов, бастама продюсері – Саин Ғабдулин.
