Наурыздың екінші сенбісі - жерге орналастыру, геодезия және картография күні. Кәсіби мерекеге орай жер саласында талмай еңбек етіп жүрген жұмысшы мамандар марапатталды.
Шара Ауыл шаруашылығы министрлігі Жер ресурстарын басқару комитетінің бастамасымен С.Сейфуллин атындағы Қазақ агротехникалық зерттеу университетінің қабырғасында өтті, деп хабарлайды aqshamnews.kz Ауыл шаруашылығы министрлігіне сілтеме жасап.
Ашылуында ҚР АШМ вице-министрі Е.Тасжүреков, Қазақстан Республикасы Ұлттық ғылым академиясының академигі З.Дүйсенбеков, Парламент Мәжілісінің депутаты Н.Әшімбетов құттықтау лебіздерін жеткізді.
«Сіздердің біліктіліктеріңіздің арқасында жер ресурстарын басқару жүйесі жетілдіріліп, тұрақты дамып келеді. Залда болашақ жерге орналастырушы, геодезист және картограф маман болатын студенттер отыр. Сіздер осы саланың ертеңі, еліміздің болашағысыздар» - деді Ербол Тасжүреков.
Шара барысында жер саласында талай жыл үздіксіз қызмет жасап келе жатқан мамандар еңбегі жоғары бағаланды. Нәтижесінде, 17 азамат «Құрметті жерге орналастырушы» салалық төсбелгісімен, 29 маман «Үздік жерге орналастырушы» Құрмет дипломымен марапатталды.
