Қазақстанда ЖРВИ бойынша эпиджағдай тұрақталып келеді, деп хабарлайды Аqshamnews.kz тілшісі Денсаулық сақтау министрлігі Санитариялық-эпидемиологиялық бақылау комитетіне сілтеме жасап.
Ведомство мәліметінше, кейінгі аптада жедел респираторлық вирустық инфекцияның (ЖРВИ) 198 532 жағдайы тіркелген. Бұл алдыңғы аптамен салыстырғанда 1,7 есе төмен.
Эпидмаусым басталғалы бері 2 295 адамның тұмаумен ауырғаны зертханалық түрде расталды. Ал тұмауға қарсы 2 268 891 адамға вакцина салынған, бұл республика халқының шамамен 11 пайызына тең.
Қазіргі тәулікке дейінгі жағдай бойынша 269 мектептегі 25 850 оқушы қашықтан оқу форматына ауыстырылған. Комитет дерегінше, бір тәулік ішінде қашықтан оқуға жіберілген оқушылар саны 73,5 пайызға, ал қашықтан оқуға ауысқан мектептер саны 40 пайызға азайған.
Санитариялық-эпидемиологиялық бақылау комитеті ЖРВИ мен тұмаудың алдын алу шараларын қатаң сақтауды еске салды. Атап айтқанда:
-
сырқат адамдармен қатынасты шектеу, науқастарды оқшаулау;
-
адамдар көп жиналатын орындарға бармау, жабық бөлмелерде маска тағу;
-
жөтелгенде және түшкіргенде ауыз бен мұрынды салфеткамен жабу;
-
үй-жайды және жұмыс орындарын тұрақты түрде желдету;
-
қолды жиі әрі мұқият жуу ұсынылады.