Астанада жұмыссыздықты азайту және халықтың табысын арттыру мақсатында қолға алынған JOLTAP жобасы табысты жүзеге асуда. Бұл туралы Aqshamnews.kz сайты хабарлайды. Қала көшелерінде «Баршаға мүмкіндік» атты модульдік пункттер ашылып, тұрғындарға түрлі салада тегін білім алуға және мемлекеттік қолдауға ие болуға жағдай жасалған.
JOLTAP аясында елордалықтар сатушы-кассир, тігінші, бариста, бухгалтерлік есеп, автослесарь, полимерлі бояу маманы, Wildberries және Kaspi платформаларында сауда жасау негіздері секілді бағыттарда қысқамерзімді курстардан өте алады. Курстарға 18 бен 50 жас аралығындағы тұрғындар қатысып, цифрлық және жұмысшы мамандықтарды тегін меңгеру мүмкіндігіне ие.
Жобаның сәтті қатысушыларының бірі – Әзиза Баубекова. Ол Kaspi дүкенінде сауда жасаудың негіздерін оқып, онлайн дүкен ашу, салық төлеу, есеп тапсыру секілді дағдыларды меңгерген. «Instagram-нан осы жоба туралы оқыдым. Жақын маңдағы модульдік пунктке барып, мамандардан кеңес алдым. Курста оқытушылар бізге барлық тақырыпты қарапайым тілде жеткізді», – дейді ол.
Негізгі қызметі – ағылшын тілінен сабақ беру болса да, Әзиза тігін ісімен де айналысады. Енді ол өз қолынан шыққан бұйымдарды Kaspi дүкені арқылы сатуды жоспарлап отыр.
Жоба қатысушысы JOLTAP туралы жылы пікірін де білдірді: «Бұл – өте пайдалы әрі тегін жоба. Жаңа орта, жаңа таныстар және шабыт алдым. Осындай бастамалар көбірек болса екен», – дейді ол.
JOLTAP жобасы – елордалықтар үшін жұмысқа орналасу, жаңа мамандық меңгеру, кәсіп ашу сияқты маңызды бағыттарда нақты көмек беріп жатқан ауқымды бастама. Мұндай жобалар Астана тұрғындарының әл-ауқатын арттырып, қоғамның әлеуметтік-экономикалық белсенділігін күшейтуге жол ашады.