Жолдауда айтылғандай, бірқатар заң қайта жазылып, баж салығының мөлшері өзгереді. Жас кәсіпкерлерге жеңілдетілген несие беріліп, жұмыссыздықпен күрес жанданады. Иә, бұл Жолдауда айтылды. Ал осы және өзге де маңызды өзгерістер туралы «Атамекен» Ұлттық кәсіпкерлер палатасы басқарма төрағасының орынбасары Ербол Өстеміров Baq.kz-ке берген сұхбатында тарқатып айтып береді, деп хабарлайды Almaty-akshamy.kz.
Жолдау жылда жарияланады, бірақ биылғы Жолдау – Жаңа Қазақстанды құру барысында бизнес-қауымдастық күткен үлкен құжат болды. Президент экономикалық, саяси реформалар туралы айтты. Оның ішінде, бизнеске тікелей қатысы бар реформалар қозғалды.
Жаңа реттеушілік саясат. Бұл реформа екі жылдан бері жүзеге асырылып келе жатыр. Өткен жылғы желтоқсанда Президент тиісті заңға қол қойған. Мемлекет басшысы реформаның аяқталу мерзімін 2024 жылдың 1 қаңтары деп бекітті. Реформаны жүзеге асыру барысында біршама проблема болды. Бұған бекітілген кестеден екі ай кешігіп жатқанымыз дәлел.
Талдауларды сапалы әрі уақытылы орындамады. Мұның бәрі қайта қарау мен реформа процесін кешіктіреді, артық әуре-сарсаңға салды. Іс жүзінде барлық салада ескірген талаптар кездеседі. Мұны бірнеше түзету енгізсек те шеше алмаймыз. Бизнеске қойылатын талаптарды талдау аяқталған салаларда барлығы үшін түсінікті жаңа ережелер белгілеу қажет. Президент те бұл реформа тек кейбір құқықтық актіні аздап өзгерту емес, кейбір саланың реттеу актілерін толық қайта жазу керегін мәлімдеді. Біз де осы «таза парақтан» реттеу реформасының базалық шарттарын жасаған кезде кейбір сала бойынша құқықтық актілер жаңадан жазылу керегін айтқан болатынбыз.
Бизнеске тікелей қатысы бар бюджет, салық кодексі жаңадан жазылатын болды. Сонымен қатар, салық әкімшілендіруі бойынша талаптар толықтай қайта жазылады. Кәсіпкерлерге ең көп кедергі келтіретін – салық органдары тарапынан жүргізілетін әкімшілендіру.
Мемлекеттік сатып алуға байланысты да жаңа заң жазылады. Мұндағы басты мақсат – тауар, қызмет, жұмысты сатып алған кезде олардың төмен құны емес, сапасы бірінші орында болуы керек. Мемлекет басшысы өз Жолдауында кәсіпкерлерге несие ресурстарының жетіспеушілігіне тоқталды. Шағын және орта бизнеске 42 млрд теңге жетіспейді. Осыған орай үкімет пен Ұлттық банкке тиісті шара қолдануды тапсырды. Белгілі бір қорларда жиналып қалған қаржыдан кәсіпкерлерге несие берудің механизмін әзірлейді.
Үлкен қалаларда, ауылдарда жұмыссыз жастар бар. Қаңтар оқиғасында да жас жігіттеріміздің қатысуына жұмыссыз болуы да әсер етті. Енді олардың кәсіпкерлікке деген ынтасын қолдап, 2,5 пайызбен несие беріледі. Бұл – өте маңызды шешім. Жастарды қолдау ғана емес, жаңа кәсіпкерлер санын көбейтіп, бизнес нысандарын арттыруға септігін тигізеді.
Жоғары сот және тиісті мемлекеттік органдармен жұмыс жалғасады. Көптеген алаңда адвокат, заңгерлермен талқылау өтіп, көптеген ұсыныс жолдауда аталды. Президент қолдап, кейбір реформаға нүкте қойды. Оның ішінде сот төрағасының қызметі таратылып, оның орнына аға сот қызметі енгізіледі. Облыстық соттар, алқа сот төрағалары, Жоғарғы сот судьялары сайлау арқылы тағайындалады. Мұны біз де қолдаймыз. Осы реформа соттардың тәуелсіздігіне оң әсер етеді.
Баждың мөлшері талапта көрсетілген соманың үш пайызын құрайды. Үлкен сомаға талап-арыз берген кезде миллиондаған сомамен баж төлеу керек. Мұны да айтқан болатынбыз. Президент енді пайыздық мөлшер емес, нақты бір абсолют санмен жасауды тапсырды. Мысалы, басқа мемлекеттерде баж салығы 20-30 мың еуро болады. Солардың тәжірибесін талдап, баж салығының жоғары мөлшерін бекіту керек. Біз 20 АЕК көлемінде бекітуді ұсынғанбыз, – деп түйіндеді Ербол Өстеміров.