Акмола облысындағы жаппай жол апаты: эвакуаторлар көліктерді оқиға орнынан әкетуде
Астана – Петропавл тасжолында бүгін болған жаппай жол апатының салдарын жою жұмыстары жалғасуда. Қазіргі уақытта жолды тазалау және құтқару операциялары жүргізіліп жатыр. Оқиға орнына шамамен 20 эвакуатор жеткізілді, деп хабарлайды aqshamnews.kz
«ҚазАвтоЖол» мәліметінше:
- 3 қаңтар, сағат 19:00-дегі жағдай бойынша Астана – Петропавл тасжолындағы апаттан 95 көліктің 24-і эвакуаторлармен шығарылды.
- 30 көлік өз жүрісімен оқиға орнынан кеткен.
- Апат орнында әлі де 41 көлік қалуда.
- Құтқару жұмыстарына 34 арнайы техника мен 20 адам жұмылдырылған.
Мобильді жылыту пунктінде азаматтарға ыстық тамақ пен шай ұсынылуда.
Жапа шеккендер туралы ақпарат
Ақмола облысы денсаулық сақтау басқармасының мәліметінше: апат салдарынан 20 адам жарақат алған, олардың ішінде сегіз бала бар.
- Ақкөл аудандық ауруханасына үш адам түрлі деңгейдегі жарақаттармен жеткізілді. Барлығының жағдайы тұрақты.
- Бұланды аудандық ауруханасына 11 адам түсті, олардың бесеуі, соның ішінде бір бала, ауруханаға жатқызылды. Қалған алты адам амбулаторлық ем қабылдауда.
- Бурабайдағы медициналық орталыққа төрт адам жеткізілді, олардың бірі ауруханаға жатқызылды, үшеуі амбулаторлық ем қабылдауда.
- Астанадан екі бала ауруханаға жатқызылды.
- 2021 жылы туған балада бас сүйек-ми жарақаты мен ми шайқалу күдігі бар.
- 2009 жылы туған жасөспірімде көкірек тұсының жабық жарақаты және тізе буынының соққыдан алған жарақаты анықталған.
Барлық ауруханаға жатқызылғандардың жағдайы тұрақты деп бағалануда.
