14 ақпанда Ауған соғысы және тәжік-ауған шекарасының ардагерлері ҰҚК Шекара қызметі Алматы облысы бойынша департаментінің Қарасай ауданы шекара басқармасына барып, жат елдің шекарасында ерлікпен қаза тапқан қаруластарының ескерткішіне гүл шоқтарын қойды. Сондай-ақ, департаменттің шекара бөлімшелерінде Ауған соғысы ардагерлерінің қатысуымен жас сарбаздарға арналған «Ерлік сабағы» өтті.
Өткен тарихқа үңілсек, осыдан 36 жыл бұрын Кеңес әскері Ауған жерінен шығарылды. Ал 2001 жылдың 8 ақпанында тәжік-ауған шекарасындағы қақтығыстар тоқтап, қазақстандық бітімгершілік батальоны өз миссиясын аяқтаған болатын. Содан бері елімізде Ауған соғысының және «ыстық нүктеге» баланған тәжік-ауған шекарасының ардагерлеріне құрмет көрсетіп, жат жерде ерлікпен қаза тапқандардың есімін мәңгілік етуге арналған шаралар тұрақты түрде өткізіліп келеді.
Департамент бастығы, полковник Серік Төлеуханов пен «Застава тарландары» республикалық қоғамдық бірлестігінің Алматы қалалық және облыстық филиалдарының өкілдері – отставкадағы генерал-майор Марат Мажитов бастаған ауғандық ардагерлерді Қарасай ауданы шекара басқармасының жеке құрамы салтанатты сап түзеп қарсы алды. Жиын барысында ескерткішке гүл шоқтары қойылып, жат елде қаза тапқан жауынгерлерді бір минут үнсіздікпен еске алу рәсімі өтті.
– Шекарашыларымыз қайда жүрсе де Отанға адал қызмет етудің үлгісін көрсетіп келеді. Ауғанстанда интернационалдық борышын өтеу кезінде ерен ерлік көрсетіп, құрбан болған шекарашы қаруластарымыз – біздің жүрегімізде мәңгі сақталады, – деді Ауған соғысының ардагері Марат Әлімжанұлы.
Жиыннан кейін ардагерлер шекара басқармасында ұйымдастырылған шағын концерттік бағдарламаны тамашалады. Зал толы көрермендер алдында сержант Дастан Сембаев пен Темірбек Жүргенов атындағы Қазақ Ұлттық өнер академиясының студенттері – Ұлан Аскер, Құзар Құмыролла, Ерсұлтан Әсетұлы, Алдияр Жүзбайұлы және Жомарт Рахымберді өнер көрсетті. Әсіресе, шекарашы өнерпаз Дастан Сембаевтың «Ауған жыры» атты Ауған соғысына 18 жасында аттанып, туған жеріне қара табытпен оралған өрімдей жас жігіттер туралы жан тебірентерлік әні залдағы әр адамның жүрегіне ерекше әсер етті.