Жыл басынан бері өңірде 1134 жас отбасы неке куәлігін алған. Былтыр 4 мыңға жуық неке тіркелген еді, деп хабарлайды аlmaty-akshamy.kz.
Соңғы жылдары өңірде отбасын құрам деген жастардың қатары артып келеді. Әттеген-айы сол, көп ұзамай ажырасуға арыз бергендер де табылады. Дегенмен үлкен мақсат жолында отбасын сақтап қалуға бейіл отаулар да жетеді. Қазір өңірде қиындыққа тап болған отбасымен жұмыс істейтін орталықтар бар. Онда тіпті арнайы психологтар қызмет көрсетеді.
Жетісуда басқа өңірлер секілді ажырасу деңгейі жоғары облыстар қатарына жатады. Алайда отбасын сақтап қалған жастар көп. Біз осы бағытта түрлі формады кездесулер өткіземіз. Әрине, алдымен отау құруға бекіп, артынан айнып қалатындар да аз емес. Олар әртүрлі себеп айтады. Мінездің үйлеспеуі, материалдық жағдайдың шешілмегені, өзара түсініспеушілік кедергі келтіреді. Ата-аналары да араға түседі. Осы ретте оны да ашып айтады, - дейді психолог Мөлдір Аманова.
Жалпы неке саны бойынша көш бастап тұрған Талдықорған қаласы мен Панфилов және Алакөл аудандары. Мұнда жүздеген отбасы отау құрған.
Бүгінде «Азаматтарға арналған үкімет» еліміздің бас қаласында және Қарағанды, Алматыда, сонымен қатар Қостанайда некені салтанатты түрде тіркейді. Қазір аталған қызметті басқа қалаларда енгізуді жоспарлануда. Оның қатарында Талдықорған да бар. Сондай-ақ баланың тууын салтанатты тіркеуді енгізу ойластырылуда. Қазірдің өзінде туу туралы куәліктерді жеткізу және оларды ата-аналарына тікелей перзентханаларда табыстау бойынша жұмыстар жүріп жатыр.
Әрине, отбасында кикілжің болып тұрады, бірақ біз оны екеуара әңгімелесіп шешеміз. Отбасы бақытты болу үшін екі адам бірдей күш салуы қажет, - дейді жаңадан отау құрған Асыл мен Әлия.