Өңірлік коммуникациялар қызметінің алаңында Жетісу ауданының әкімі Ләззат Жылқыбаева есеп берді. Іс-шара барысында аудан әкімі «Келешек мектептері» ұлттық жобасы аясында салынып жатқан жаңа білім беру нысандары мен басқа да қолға алынған бастамалар жөнінде баяндады, деп хабарлайды aqshamnews.kz
Оқушы орнының тапшылығын азайту үшін 2024 жылдың сәуір айында Бұрындай көшесінде 1200 орындық жаңа мектеп салына бастады. Құрылыс жұмысын 2025 жылдың желтоқсанында аяқтамақ ойда.
«Былтырғы шілде айында №43 мектепке спорт пен акт залдарын қосу бойынша жобалық-сметалық құжаттаманы (ЖСҚ) әзірлеу басталды. Сонымен қатар №87 мен №118 мектепке қосымша ғимараттар салуды жоспарлап отырмыз», – деді Ляззат Жылқыбаева.
2024 жылдың желтоқсан айында Айнабұлақ ықшамауданында 160 орындық жаңа балабақша пайдалануға берілді. Сонымен қатар №163 балабақша мен Ратушный көшесі- 139 мекенжайындағы балабақшаны жаңартуды көздейтін ЖСҚ әзірленіп жатыр.
Бұдан бөлек, Айнабұлақта алғаш рет шығармашылық даму орталығын салу жоспарланып отыр. Бұл орталықта робототехника, IT, дизайн, музыка, театр мен басқа да бағыттарды да қамтыған студиялар орналасады. Жобалық-сметалық құжаттама 2025 жылдың үшінші тоқсанында аяқталып, төртінші тоқсанда құрылыс жұмысы басталмақ.
«Жаңа орталықта шығармашылықпен айналысқысы келетін балалар мен жасөспірімдерге арналған түрлі бағыттағы үйірмелер мен студиялар жұмыс істейді. Орталық жаңа құрал-жабдықпен жабдықталып, балалардың қабілетін ұштауға көмектеседі», – деп атап өтті Ләззат Жылқыбаева.