Жапонияда Mori JP Tower деп аталатын төбесі «көк тіреген» зәулім ғимарат пайда болды.
Биіктігі 325,2 метрлік ғимараттың ең басты артықшылығы – зілзалаға төзімді, энергияны аз тұтынады, деп хабарлайды Almaty-akshamy.kz.
Pelli Clarke & Partners компаниясының сәулетшілері мен білікті мамандары жобасын сызған Mori JP Tower ғимараты жасыл желек жамылған Токионың Azabudai Hills кешенінде тұрғызылған. 64 қабаттан тұратын ғимаратта тұрғын үйлермен қоса, кеңсе, Aman мейманханасы, т.б. орналасқан. 9,0 балдық күші бар жер сілкінісі кезінде де әдеттегідей жұмыс істейді. Ғимараттың құрылымдық болат құбырлары аса мықты бетонмен толтырылды. Осылайша ғимарат зілзала кезінде аз теңселеді. Мұнарада 3600 адамға арналған уақытша баспана, сондай-ақ, апаттан зардап шеккендерге көмек көрсетуге арналған қойма бар. Электр энергиясы жаңғыртпалы қуат көздерінен алынады. Мәселен, жылу канализациялық жүйеден келсе, жауын суы автоматты түрде тазартылып, жасыл желекті суғаруға кетеді.