Алматы қаласы Наурызбай ауданының комьюнити-орталығында Конституцияның жаңа жобасын талқылауға арналған диалог алаңы ұйымдастырылды.
Іс-шара барысында жастар Конституция тақырыбында өз ой-пікірлерін арнайы параққа жазып, оны ортақ тақтаға ілді. Жазбада Қазақстан Республикасының Конституциясының қоғамдағы рөлі, жастардың құқықтары мен міндеттері, заң үстемдігі мен азаматтық жауапкершілік туралы жеке көзқарастары көрініс тапты. Кездесу интерактивті және пікірталас форматында болды.
- Мақсатымыз – жастардың азаматтық белсенділігін арттыру, құқықтық мәдениетін дамыту, жастардың Конституция туралы құқықтық сауаттылығын арттыру, азаматтық ұстанымын қалыптастыру, заң үстемдігі мен жауапкершілік қағидаттарын түсіндіру, сондай-ақ жастар арасында ашық пікір алмасу мен белсенді азаматтық қатысуды дамыту, – деді Наурызбай ауданы комьюнити орталығының жетекшісі
Іс-шараға жастар ұйымдарының өкілдері, сарапшылар, комьюнити-орталық жетекшілері, қоғамдық ұйымдар мен медиа саласының өкілдері қатысты. Жиынға қатысқандардың бірі Айбек Берікболұлы жаңа Конституция жобасына қатысты пікір білдірді.
- Кездесу белсенді жастардың және студенттердің қатысуымен өтті. Биыл 15-наурызда өтетін жалпыхалықтық референдум жайлы өз позициямыз бен көзқарасымызды білдірдік. Алматы қаласының жастары әрдайым науқандарға, акцияларға белсенді қатысуға дайын. Жалпы Конституция — ол ең алдымен мемлекеттің тірегі. Сондықтан заман ағымына сай оның толықтырылып, бекітілу керек деп ойлаймын. Оның ішіндегі жаңа Конституция жобасында цифрлық қауіпсіздік тармағының қосылуы құптаймын. Цифрлық қауіпсіздік осы кезге дейінгі заңда мүлдем белгіленбеген еді. Енді заң аясында осы бағытта адамның құқықтары нақты бекітілді, – деді ол.