Адам папиллома вирусына (АПВ) қарсы егу денсаулық сақтау саласындағы, әсіресе жасөспірім қыздар үшін барған сайын өзекті тақырып болып келеді. АПВ жатыр мойны обыры мен басқа да қатерлі ісіктің негізгі себебінің бірі. Сондықтан бұл вирустың алдын алу өте маңызды, дейді Алматы №36 қалалық емхананың дәрігері Қарлығаш Қалиева.
Дәрігер егудің негізгі себебін жатыр мойны обырының алдын алу деп санайды, өйткені адам папиллома вирусы осы аурудың дамуының негізгі қауіп факторы.
Жыныстық белсенділікке дейін аталған екпені егу вирусты жұқтыру мүмкіндігін толығымен жояды және, тиісінше, қатерлі ісік ауруының даму қаупін азайтады.
«Клиникалық зерттеулер көрсеткендей, адам АПВ тасымалдаушысымен байланыста болмаған жағдайда вакцина 91-100% тиімді. Бұл екпені денсаулықты қорғаудағы маңызды қадамға айналдырады», - дейді Қарлығаш Қалиева.
АПВ екпесі қауіпсіз және жақсы төзімді. Ықтимал жанама әсерлер әдетте жеңіл әрі қысқа мерзімді. Вакцина ұрпақты болу функциясына әсер етпейтінін ескеру маңызды.
АПВ екпесі міндетті күнтізбеге енгізілген елдерде жатыр мойны обырының сырқаттанушылық деңгейі айтарлықтай төмендеді. Бұл аталған екпе егу бағдарламасының жоғары тиімділігін көрсетеді.
Естеріңізге сала кетейік, Қазақстанда 2024 жылдың қыркүйегінен бастап ата-ана келісімімен 11 жастағы жасөспірім қыздарды АПВ-ға қарсы вакцинациялау басталады.
«2024 жылдың қыркүйегінде басталатын науқан ата-ана мен қалың қауымның қолдауы мен түсінуін талап етеді. Вакцинация жатыр мойны обырынан болатын аурушаңдық пен өлім-жітімді айтарлықтай төмендетуі мүмкін, бұл болашақта аталған мәселені толығымен жою туралы айтуға мүмкіндік береді», - деп түйіндеді дәрігер.