Алматылық онкологтар елде алғаш болып химиопрепараттарды дайындауға арналған KiroOncology роботтандырылған жүйесін енгізді.
Алматы Қазақстандағы технологиялық медицинаның флагманына айналып келеді. Елде алғаш рет Алматылық онкология орталығында химиопрепараттарды дайындаудың роботтандырылған KiroOncology жүйесі енгізілді. Бұған дейін аталған жүйе тек Еуропа мен АҚШ клиникаларында пайдаланылған. Бұл туралы Алматы қаласы Өңірлік коммуникациялар қызметінде өткен баспасөз мәслихатында Алматы қаласы әкімінің орынбасары Нұрлан Әбдірахым мәлімдеді.
Оның айтуынша, сондай-ақ Қазақстанда алғаш рет №3 қалалық емханада тіркеуші қызметін атқаратын жасанды интеллект негізіндегі дауыс роботтары іске қосылды. Жүйе пациенттің сөзін естіп, түсінеді, кеңес береді және өтінішті реттейді. Алдағы уақытта бұл тәжірибе барлық қалалық емханаға енгізіледі.
«Алматы медицинаны неғұрлым дәл, қауіпсіз әрі қолжетімді ететін технологияларды енгізіп келеді», — деді Нұрлан Әбдірахым.
Сонымен қатар, қалалық кардиология орталығы базасында алғаш рет қалалық деңгейде жүрек трансплантациясы бойынша ота жасалуға дайындық жүргізіліп жатыр.
Кадрлық әлеуетке ерекше көңіл бөлінуде. Алматы әкімінің орынбасарының айтуынша, жыл сайын қаланың медициналық мекемелеріне 400 жас маман жұмысқа келеді, олар баспанамен және әлеуметтік кепілдіктермен қамтамасыз етіледі. Сұраныс жоғары бағыттар бойынша 124 дәрігер резидентураға жіберілген.