Алатау ауданындағы Оқушылардың инновациялық шығармашылық орталығында "Патриоттық рух – басты құндылық" тақырыбында ұйымдастырылған эссе жазу байқауының жеңімпаздары марапатталды. Іс-шараны республикалық "Жанашыр" халықаралық қоғамдық қоры Алматы қаласының Қоғамдық даму басқармасының қолдауымен өткізді.
Бұл шараның басты мақсаты – оқушылар арасында патриоттық құндылықтарды насихаттап, олардың шығармашылық қабілеттерін дамыту және қолдау.
– Конкурсқа Алматы қаласының 40 мектебінен 200-ден астам оқушы қатысты. Байқауға 4-6 және 7-9-сынып оқушылары өз жұмыстарын ұсынды. Қазылар алқасы олардың шығармаларын мұқият саралап, үздік эсселерді анықтады. Желтоқсан оқиғасы, Тәуелсіздік, Отан және патриоттық сезім тақырыптарына қалам тербеген оқушылар бағалы сыйлықтармен марапатталды. Іс-шараға "Алматы ақшамы", "Ұлан", "Дружные ребята" басылымдарының өкілдері де қатысып, бізге қолдау көрсетті, – деді жоба жетекшісі, "Жанашыр" халықаралық қоғамдық қорының төрайымы Жаңыл Әпетова.
Шығармашыл оқушыларға ерекше сый
Alatau-Aqparat медиахолдингіне қарасты "Алматы ақшамы" газеті шығармашыл өрендерді қолдау мақсатында арнайы сыйлық тағайындады.
– Біздің газет ұжымы №99 мектептің 5-сынып оқушысы Айжан Жұмаділдәнің эссесін үздік деп таныды. Айжан өз шығармасында атасы мен әжесінің тәрбиесін негізге ала отырып, патриотизмді үлкендерден алған өнегемен шебер ұштастырған. "Отан – отбасынан басталады" десек, бұл эсседен мейірімділік, қамқорлық, елге деген сүйіспеншілікке бағытталған тәрбиенің көрінісін байқадық. Осындай ортада өскен баланың болашағы жарқын болары сөзсіз, – деп атап өтті сыйлықты табыстаған "Алматы ақшамы" газетінің бөлім редакторы, "Ақпарат саласының үздігі" Нұржамал Әлішева.
Бұл байқау алматылық оқушылардың патриоттық рухын оятып, олардың шығармашылық әлеуетін арттыруға серпін берді. Елін, жерін сүйетін ұрпақ тәрбиелеу жолында осындай шаралардың маңызы зор.