Жапонияда қарт адамдар арасында түрмеге өз еркімен бару құбылысы жиілеп келеді. Бұл туралы Aqshamnews.kz сайты хабарлайды.
CNN-нің деректеріне сүйенсек, елдегі ең ірі әйелдер түрмелерінің бірі қарт адамдармен толтырылған. Түрме қызметкерлерінің айтуынша, жалғыздық мәселесі соншалықты өзекті болғандықтан, көптеген қарт адамдар еркіндіктен гөрі түрмеде қалуды жөн көреді.
Тотиги түрмесінің қызметкері Такаеси Сиранага атап өткендей:
"Кейбіреулер тіпті мұнда өмір бойы қалу үшін айына 20-30 мың йен төлеуге дайын."
Түрмеде жазасын өтеп жатқан қарт адамдар тұрақты тамақтану, тегін медициналық көмек және әлеуметтік қолдау алады. Бұл артықшылықтар олардың сыртқы өмірге қарағанда түрмеде өзін қауіпсіз сезінуіне ықпал етеді.
81 жастағы әйел, түрмеде тамақ ұрлағаны үшін жазасын өтеп жатқанын айта отырып:
"Бұл түрмеде жақсы адамдар бар. Мүмкін, бұл менің ең тұрақты өмірім шығар," – деп бөлісті.
Жапонияда 65 жастан асқан адамдардың 20%-ы кедейлікте өмір сүреді. Көптеген қарттар аштық, суық және медициналық шығындар сияқты қиындықтарға тап болады. Сиранага түсіндіргендей:
"Кейбір адамдар мұнда суықтан немесе аштықтан қорғану үшін келеді. Олар түрмеде болғанда тегін медициналық көмек алады, бірақ бостандыққа шыққан соң оны өздері төлеуі тиіс. Сондықтан мұнда барынша ұзақ қалуға тырысады."
Бұл жағдай мемлекетке қарттардың өмір сүру сапасын жақсарту бойынша қосымша шаралар қабылдау қажеттігін меңзейді.