Жап-жарық қала – жайлылық кепілі

Алматы қаласының түнгі келбеті күн санап көркейіп келеді. Қала әкімі Дархан Сатыбалды мегаполистің түнгі жарықтандыру жүйесін тексеріп, жаңа LED-шамдармен жабдықталған көшелер мен ғимараттарды аралап шықты. Бұл – Алматыны тек күндіз ғана емес, түнде де қауіпсіз, жарық әрі тартымды қалаға айналдыруды көздейтін маңызды қадамдардың бірі.

Негізгі мақсат – қаладағы жайлы орта мен қауіпсіздік мәдениетін қалыптастыру. Алматы әкімдігі бұл бастаманы қаланың сәулеттік келбеті мен тұрғындардың түнгі жүріп-тұру қауіпсіздігін арттыру үшін қолға алды. Қазірдің өзінде Абай, Достық даңғылдары мен Қонаев көшесі бойындағы 21 ғимарат жарықтандырылды. 1600-ден астам заманауи LED-шамдар орнатылып, түнгі Алматының ажарын арттырды. Төлебаев көшесіне 97 жаңа шам қойылып, ол бұрынғыдан әлдеқайда жарық әрі көрікті көшеге айналды. Бұл бағыттағы жұмыс осылай жалғаса берсе, оңтүстік астана таяу жылдары әлемнің ең жарық, ең жайлы қалаларының қатарына енуі әбден мүмкін.

Ал бүгінгі таңда түнгі жарық деңгейі бойынша Алматы әлемнің ең жарық 50 қаласының қатарына кірмейді. Дегенмен, Орталық Азия бойынша алдыңғы орында тұр. Яғни Елорда мен Ташкенттен жарық, бірақ Токио, Сеул, Нью-Йорк, Лас-Вегас сияқты мегаполистерден әлдеқайда төмен.

Light Pollution Map пен NASA ғарыш суреттері бойынша қарастырғанда, Алматы орталығы Bortle шкаласы бойынша 8-9 класына жатады (яғни қаланың жарығы жоғары), алайда шаһар шетінде жарық аз, қараңғы аймақтар бар. Көктөбеден қарағандағы қаланың түнгі көрінісі өте әсерлі. Бұл Алматының түнде де жанды, кең тынысты қала екенін көрсетеді.

Алматы мен әлемнің басқа да қалаларын салыстырар болсақ:

Қала билігінің жарықтандыруға қатысты жүйелі жұмысы Алматыны тек қауіпсіз ғана емес, эстетикалық тартымды қалаға айналдыруға бағытталған. Жарық – тек шам емес. Ол – түнгі тыныштық пен қауіпсіздіктің, қала көркі мен тұрғындар көңіл күйінің де көрсеткіші, ең бастысы, адамзат жетістігі, өркениеттің ажырамас бөлігі.