Кездесу бүгінге жоспарланған еді.
Боксшы Жәнібек Әлімханұлы жекпе-жек алдында есінен танып, ауруханаға түсті, деп хабарлайды Almaty-akshamy.kz
WBO және IBF тұжырымдары бойынша орта салмақтағы әлем чемпионы Жәнібек Әлімханұлы мен жаңа зеландиялық Андрей Михайлович арасындағы жекпе-жек өтпейтін болды.
Жәнібек бейсенбі күні салмақ қуу кезінде өзін нашар сезініп, ауруханаға түскен.
Бұл туралы Жәнібек Әлімханұлы командасының менеджері Берік Сұлтан өзінің ФБ парақшасында жазды.
"Құрметті ағайындар! Жекпе-жек болмайды деген жаңалықты оқып сіздердің де көңіл күйлеріңіз түскенін білеміз. Себебі жанашыр, тілеулес екендеріңізді білеміз!
Әлемнің түкпір-түкпірінен қаншама жанкүйер өнерімізді көрсек деп асыға күтті. Біз де рингте Qazaq style-ды көрсету үшін барымызды салып дайындалдық.
Дегенмен көп спортшылар сияқты біз де салмақ жасау барысында қиындыққа тап болдық. Бірінші рет осындай жағдайды бастан өткердік. Оңай емес екен! Түнімен ауруханада болдық! Мұны да көру керек болған шығар! Қазір Жәнібектің жағдайы бірқалыпты!
Денсаулық бірінші орында! Бұйыртса 2-3 ай қалыпқа келіп, рингке қайта ораламыз!
Тілеулес жандардың бәріне мың алғыс! Ауырмаңыздар!
Құрметпен, Qazaq style командасы!" деген жазба жариялады Берік Сұлтан.