Шығыс Қазақстан облысының Тарбағатай ауданында орналасқан Жалғызтал ауылының тұрғындары толықтай спирттік ішімдіктерден бас тарты. Осылайша 150 адам тұратын және 30 үйден құралған бұл ауыл ресми түрде «алкогольсіз ауыл» мәртебесін алды. Бұл шешім құқық бұзушылықтардың алдын алу, қоғамдық тәртіпті нығайту және салауатты өмір салтын насихаттау мақсатында қабылданған шаралардың бір бөлігі болып табылады, деп хабарлайды aqshamnews.kz
Жалпы, бұл қадам әлеуметтік жағдайды жақсартуға және ауылдағы тыныштықты сақтауға бағытталған.
Құқық қорғау органдарының деректері бойынша, соңғы үш жыл ішінде Жалғызтал ауылында бірде-бір қылмыс тіркелмеген. Полиция өкілдері ауыл тұрғындарының бастамасын қолдап, алкогольдің көп жағдайда тұрмыстық жанжалдар мен басқа да қылмыстарға себепкер болып жататынын атап өтуде.
Жалғызтал ауылы Шығыс Қазақстан облысындағы алкогольден бас тартқан алтыншы елді мекен болды. Ауыл тұрғындары бұл қадамды тыныш әрі дені сау өмірге жасалған маңызды қадам ретінде бағалайды және өздерінің үлгісі басқа қазақстандықтарды да осы бастаманы қолдауға шақырады.