Жалған құжат 5 000-нан 30 000 теңге аралығында саудаланған.
Қаржылық мониторинг агенттігінің қызметкерлері Алматы, Шымкент, Ақтөбе, Павлодар және Тараз қалаларында жалған вакцина паспортын сатқандарды анықтады, деп хабарлайды Almaty-akshamy.kz аталған агенттіктің Telegram-каналына сілтеме жасап.
Аталған фактілерге сәйкес, Қылмыстық кодекстің 385-бабында көзделген қылмыстық құқық бұзушылық құрамының белгілері, яғни жалған құжат жасау бойынша сотқа дейінгі тергеу басталды.
Қазіргі уақытта жалған вакцина паспорты берілген 37 азамат, сондай-ақ, жалған құжат жасауға қатысы бар 12 адам, оның ішінде 8 медицина қызметкері анықталды.
Басқа күдікті тұлғаларды анықтау бойынша жедел-тергеу шаралары жалғасуда.
Қаржылық мониторинг агенттігі азаматтарға жалған вакцина паспорттарын пайдаланғаны үшін 160 АЕК (467 мың теңге) мөлшерінде айыппұл салынатынын немесе сол мөлшерде түзеу жұмыстары не 160 сағатқа дейінгі мерзімге қоғамдық жұмыстар болмаса 40 тәулікке дейін қамауға алынатынын еске салады. Паспортты тікелей қолдан жасаған адамдарға, оның ішінде медицина қызметкерлеріне қатаң жаза қарастырылған. Оларға 2000 АЕК (5,8 миллион теңге) мөлшерінде айыппұл салынады немесе 600 сағатқа дейінгі мерзімге қоғамдық жұмыстарға тартылады немесе 2 жылға дейін бас бостандығынан айырылмақ.