Қазақстанда қоғамдық орындарда хайп үшін жасалатын әрекеттер жиілегеніне байланысты Ішкі істер министрлігі азаматтарға үндеу жасады, - деп хабарлайды Aqshamnews.kz тілшісі Polisia.kz-ке сілтеме жасап.
"Лайк жинау үшін жасалған әрекет батылдық та, креатив те емес"
Министрлік өкілі Шыңғыс Әлекешевтің айтуынша, жақында жастардың сауда орталықтарында немесе көшеде жартылай жалаңаштанып жүгіріп, айқайлап, қоғамдық тәртіпті бұзып, отбасылар мен балаларға қолайсыздық туғызған фактілері тіркелген. Мұндай әрекеттер заңмен жазаланады. Мәселен, жуырда Астанада осындай тәртіп бұзған азамат 15 тәулікке қамалды.
"Лайк жинау үшін жасалған мұндай әрекет батылдық та, креатив те емес. Бұл – қоғамдық тәртіпті бұзу, көпшілікке құрметсіздік көрсету, ар-ұятқа жат қылық. Қоғамдық орында жасалған кез келген заңға қайшы немесе ұят әрекетке жол берілмейді. Заңға сәйкес жауапқа тартылады", - деді Әлекешев.
"Өзіңізді де, айналадағы адамдарды да құрметтеңіздер"
ІІМ өкілі қазақстандықтарды, әсіресе жастарды, күмәнді интернет-трендтерге ермеуге шақырып, адамдық қадір-қасиетті сақтау қажеттігін атап өтті. Министрлік мұндай оқиғаларды дереу тоқтататынын және қоғамдық тәртіп пен қауіпсіздікті қадағалауды жалғастыратынын мәлімдеді.
"Баршаға, әсіресе жастарға айтарымыз: күмәнді интернет-трендтерге ермеңіздер. Өзіңізді де, айналадағы адамдарды да құрметтеңіздер. Нағыз құрмет пен абырой жақсы іс, пайдалы ой, дұрыс әрекет арқылы келеді", - деді ресми өкіл.
Оқиға анықтамасы
Еске салайық, 21 қазанда Астанада ер адам сауда орталығында ішкиіммен жүгіріп, тұрғындардан өзіне пәтер сыйлауды сұраған. Видеоға қарағанда, ол Беларусь блогері Mellstroy-дың пәтер ұтысына қатыспақ болған.