Әлеуметтік желілерде Иран аумағында "қышқыл жауын" жауып, Орталық Азия елдеріне жетуі мүмкін деген ақпарат тарады, – деп хабарлайды aqshamnews.kz тілшісі.
Алайда "Қазгидромет" мамандары бұл мәліметтің шындыққа жанаспайтынын мәлімдеді. Олардың айтуынша, жүргізілген бақылаулар мен ғылыми деректер мұндай хабарламаларды растамайды.
Яғни Иран аумағында пайда болып, Орталық Азияға таралуы мүмкін делінген "қышқыл бұлттар" туралы ақпарат ешқандай ғылыми дәлелдермен немесе мониторинг нәтижелерімен бекітілмеген.
Мамандардың түсіндіруінше, қышқыл жауын-шашындар көбіне атмосфераға өнеркәсіп, энергетика және көлік салаларынан бөлінетін күкірт пен азот оксидтерінің әсерінен түзіледі.
Әдетте мұндай құбылыс ластаушы көздерге жақын орналасқан аймақтарда байқалады. Ал ауа массалары ұзақ қашықтыққа тараған кезде бұл заттардың мөлшері атмосферадағы табиғи процестердің әсерінен айтарлықтай азаяды.
Мониторинг нәтижелері бойынша Қазақстан мен Орталық Азия бағытында мұндай зиянды заттардың таралу белгілері тіркелмеген. Осыған байланысты мамандар тұрғындарға тек ресми метеорологиялық және экологиялық қызметтердің деректеріне сүйеніп, тексерілмеген ақпаратты таратпауға кеңес береді.