Қазақстанда ипотекалық несие бойынша ең жоғары пайыздық мөлшерлеме кемінде 2026 жылғы 1 шілдеге дейін өзгеріссіз қалады, деп хабарлайды aqshamnews.kz
Қаржы нарығын реттеу агенттігі мен Ұлттық банк 5 қаңтарда бірлескен шешім қабылдады. Соған сәйкес, ипотека пайызын төмендету кейінге қалдырылды.
Қазір Қазақстанда несиелер бойынша мынадай ең жоғары пайыздар қолданылады:
кепілсіз несие — 46%
кепілмен берілетін несие — 35%
ипотека — 25%
Мәселе неде?
Билік ипотеканың ең жоғары пайызын 20%-ға дейін түсіргісі келген. Бірақ қазан айында негізгі пайыздық мөлшерлеме 18%-ға көтерілген соң, банктер үшін ипотека беру тиімсіз болып қалды. Соның салдарынан көптеген ірі банктер коммерциялық ипотеканы тоқтатты.
Ипотека нарығы мүлде тоқтап қалмас үшін, билік пайызды төмендетуді кейінге шегеруді жөн көрді.
Қазір банктерде 20%-дан жоғары пайызбен мақұлданған өтінімдер көп. Егер шекті пайызды қазір төмендетсе, сол адамдар ипотека ала алмай қалуы мүмкін. Сондықтан уақытша бұрынғы деңгей сақталып отыр.
1 шілдеден кейін не болады?
Билік 2026 жылдың ортасына дейін ипотека пайызын көтермейтінін айтты. Бірақ 1 шілдеден кейін ипотека беру тәртібі өзгереді.
Болашақта ипотека пайызы:
бастапқы жарна көлеміне,
несие алу мерзіміне,
сатып алынатын үйдің бағасына байланысты болады.
Яғни, ипотека пайызы әр адамға жеке есептелетін жүйеге көшуі мүмкін.