Семейде 19 жастағы тұрғыны алаяқтық схемаға тартылған. Қазір полиция оның өз шотын қылмыстық мақсатта пайдаланылғанын білген-білмегенін анықтап жатыр, - деп хабарлайды aqshamnews.kz Абай облыстық полиция департаментіне сілтеме жасап.
Ведомствоның мәліметінше, 2025 жылғы 15 желтоқсанда Семей қалалық полиция бөліміне Астанадан банк шотын танымайтын адамдарға бергені үшін материал жолданған. Зардап шегуші – елорда тұрғынына келтірілген жалпы шығын көлемі 9 млн теңге болған.
Тергеу барысында алаяқтық жолмен жымқырылған қаражат үшінші тұлғаның есепшотына аударылғаны анықталған. Оның ішінде 400 мың теңге Семейдің 19 жастағы тұрғынының атына рәсімделген шотқа түскен.
Жігіттің айтуынша, қазанда оған интернет арқылы табыс табу ұсынылған. Онлайн-платформаға тіркеліп, мессенджер арқылы байланысқан белгісіз адамдар «жұмыс» ретінде оның жеке деректерін сұраған. Нәтижесінде, олар жігіттің есепшотын қылмыстық жолмен алынған ақшаны қабылдау үшін пайдаланған.
Қазір полиция жігіттің алаяқтық схемаға әдейі қатысқан-қатыспағанын анықтап жатыр. Абай облыстық полиция департаменті банк картасын, шот деректерін, қосымшаларға қолжетімділікті немесе жеке мәліметтерді бөгде адамдарға беру – заңсыз әрекет екенін ескертті. Мұндай тұлғалар алаяқтардың ақшасын өткізуші дроппер ретінде танылып, заң алдында жауапкершілікке тартылады.