Мемлекет басшысы жариялаған «Жұмысшы мамандықтары жылы» аясында экономикада сұранысқа ие салалар бойынша мамандар даярлауға ерекше назар аударылып отыр. Бұл туралы ғылым және жоғары білім министрі Саясат Нұрбек хабарлады.
Оның айтуынша, биыл мектепті 216 мың түлек тәмамдап, жоғары білімге қадам басты. Сүйінші жаңалық — дәл осы жылы бөлінген мемлекеттік білім беру гранттарының 60%-дан астамы инженерлік және техникалық мамандықтарға бағытталған. Жалпы бакалавриат деңгейінде 78 мыңға жуық грант, ал магистратура мен докторантураға 93 мыңнан астам грант бөлінген. Ең жоғары сұранысқа ие үш бағыт бойынша: педагогикаға — 13 мың, ақпараттық технологиялар мен жасанды интеллектке — 11 мың, ал инженерлік салаға — 18 мыңнан астам грант бөлініп отыр.
Министр атап өткендей, биылдан бастап сирек және қажетті мамандықтарға — ветеринария, энергетика, су шаруашылығы, ирригация, гидротехнологиялар секілді салаларға өңірлік квоталар енгізілді. Бұл квоталар енді әр өңірдің нақты экономикалық қажеттілігіне сай бөлінеді. Мысалы, былтыр ашылған Қазақ ұлттық су шаруашылығы және ирригация университеті биылдан бастап қолдау ретінде осы бағыттағы арнайы квоталарды алып отыр.
Жаңа енгізілген маңызды бастамалардың бірі — әскери борышын өтеп келген азаматтарға арналған білім беру гранттары. Қорғаныс министрлігімен бірлескен жұмыстар нәтижесінде биыл тұңғыш рет әскери борышын өтеген жастарға 2 мыңға жуық грант бөлінді. Бұл шара азаматтарды әскери қызметке ынталандыру мақсатында қолға алынды.
Сонымен қатар, ата-анасынан айырылған жетім балалар мен әлеуметтік осал топтардан шыққан талапкерлер үшін де арнайы квоталар қарастырылған. Тағы бір жағымды жаңалық — биыл «Серпін» бағдарламасы аясында бұрын-соңды болмаған нәтиже тіркелді: гранттардың 83%-ы игерілді. Бұл көрсеткіш бұған дейін 40–50% деңгейінде болған болса, былтыр 67%-ға жеткен еді. Қазір бағдарлама аясында жастар еліміздің 9 өңірінде білім алып жатыр.